പി.വി. അൻവറിന്​ സി.പി.എം മറുപടി പറയേണ്ട കാര്യമില്ല -എ. വിജയരാഘവൻ

തൃശൂർ: പി.വി. അൻവർ എം.എൽ.എ പറയുന്ന കാര്യങ്ങളിൽ സി.പി.എം മറുപടി പറയേണ്ട കാര്യമില്ലെന്ന് പോളിറ്റ് ബ്യൂറോ അംഗം എ. വിജയരാഘവൻ. അൻവർ പാർട്ടി എം.എൽ.എ അല്ല, സ്വതന്ത്രനാണെന്നും വിജയരാഘവൻ വാർത്തസമ്മേളനത്തിൽ പറഞ്ഞു.

ആർ.എസ്.എസ് നേതാവിനെ എ.ഡി.ജി.പി സന്ദർശിച്ചത്​ സി.പി.എം അന്വേഷിക്കേണ്ട കാര്യമല്ല. അത്​ സർക്കാർ പരിശോധിക്കും. എല്ലാ കോൺഗ്രസുകാരും ചേർന്ന് മുഖ്യമന്ത്രിയെ വളഞ്ഞിട്ട് ആക്രമിക്കുന്നതിൽ ഗൂഢാലോചനയുണ്ട്. ആർ.എസ്.എസിനെതിരെ എന്നും ശക്തമായി നിലകൊണ്ട സി.പി.എമ്മിനെ ഏറെക്കാലം സെക്രട്ടറിയായി നയിച്ചത് പിണറായി വിജയനാണ്. കോൺഗ്രസുകാരാണ്​ എന്നും ആർ.എസ്.എസ് ബന്ധം പുലർത്തുന്നത്. ആർ.എസ്.എസുമായി വോട്ടുകച്ചവടം നടത്താത്ത ഒരു കോൺഗ്രസ് നേതാവും കേരളത്തിലില്ല.

വി.ഡി. സതീശന്‍റെയും കൂട്ടരുടെയും പ്രവർത്തനരീതിയാണ് ആർ.എസ്.എസ് ബന്ധം. ആ കുപ്പായം സതീശൻതന്നെ ധരിച്ചാൽ മതി. സി.പി.എമ്മിനോ മുഖ്യമന്ത്രിക്കോ നേരെ വേണ്ട. കോൺഗ്രസ് നേതാക്കളുടെ മക്കളെല്ലാം ബി.ജെ.പിയിലേക്കാണ് പോകുന്നത്. തൃശൂർ പൂരം അലങ്കോലപ്പെട്ട സംഭവത്തിൽ സർക്കാർ നടപടിയെടുത്തു. പൊലീസ്​ കമീഷണറെ മാറ്റി. സ്ഥലംമാറ്റം ചെറിയ കാര്യമല്ല. ഇതുസംബന്ധിച്ച റിപ്പോർട്ടിൽ സർക്കാർ നടപടി സ്വീകരിക്കും.

പൊലീസ് ഉദ്യോഗസ്ഥർ പല ആവശ്യത്തിന്​ പലരെ കണ്ടിട്ടുണ്ടാകും. അത് സി.പി.എമ്മിന്‍റെ രാഷ്ട്രീയവുമായി ബന്ധപ്പെട്ട കാര്യമല്ല. ദൂതനായി പൊലീസുകാരനെ അയക്കാൻ മാ​ത്രം വിവരദോഷിയല്ല മുഖ്യമന്ത്രി. മുസ്‌ലിം വർഗീയവാദികളെ കക്ഷത്തിൽവെച്ചാണ് പ്രതിപക്ഷനേതാവ് ഗിരിപ്രഭാഷണം നടത്തുന്നത്. തൃശൂരിൽ ബി.ജെ.പി ജയിച്ചപ്പോൾ 86,965 വോട്ടാണ്​ കോൺഗ്രസിന് നഷ്ടമായതെന്നും വിജയരാഘവൻ പറഞ്ഞു.