മുസ്‌ലിംലീഗ് സംസ്ഥാന ഉപാധ്യക്ഷൻ വി.കെ. അബ്ദുൽ ഖാദർ മൗലവി അന്തരിച്ചു

കണ്ണൂര്‍: ഹരിതരാഷ്​ട്രീയത്തിലെ സൗമ്യസാന്നിധ്യം മുസ്​ലിം ലീഗ്​ സംസ്ഥാന വൈസ്​ പ്രസിഡൻറ്​ വി.കെ. അബ്​ദുൾ ഖാദര്‍ മൗലവി (79) അന്തരിച്ചു. ജുമുഅ നമസ്‌കാരം കഴിഞ്ഞ് കണ്ണൂർ താണയിലെ വീട്ടിലെത്തിയ ഉടന്‍ കുഴഞ്ഞുവീണ മൗലവിയെ ആശുപത്രിയിലെത്തിച്ചെങ്കിലും രക്ഷിക്കാനായില്ല. ഉച്ച മൂന്നു മണിയോടെ കണ്ണൂര്‍ താണയിലെ സ്‌പെഷാലിറ്റി ആശുപത്രിയിലായിരുന്നു അന്ത്യം. ഖബറടക്കം ശനിയാഴ്​ച രാവിലെ എട്ടു മണിക്ക് സിറ്റി ജുമുഅത്ത് പള്ളി ഖബറിസ്​ഥാനില്‍.

അരനൂറ്റാണ്ട്​ നീണ്ട പൊതു​പ്രവർത്തനത്തിൽ രാഷ്​ട്രീയത്തിനും ​സമുദായത്തിനും അതീതമായ സ്വീകാര്യത നേടിയ വ്യക്​തിയാണ്​ അബ്​ദുൽ ഖാദർ മൗലവി. 1960കളില്‍ മുസ്​ലിം ലീഗ് അലവില്‍ ശാഖാ പ്രസിഡൻറായാണ്​ രാഷ്​ട്രീയ പ്രവേശം. അവിഭക്ത കണ്ണൂര്‍ ജില്ല എം.എസ്.എഫ് വൈസ് പ്രസിഡൻറ്​, യൂത്ത് ലീഗ് കണ്ണൂര്‍ താലൂക്ക് പ്രസിഡൻറ്​, മുസ്​ലിം ലീഗ്​ ജില്ല ജനറല്‍ സെക്രട്ടറി, കണ്ണൂര്‍ ജില്ല സെക്രട്ടറി, ജനറല്‍ സെക്രട്ടറി, പ്രസിഡൻറ്​, 1975 മുതല്‍ മുസ്​ലിം ലീഗ് സംസ്ഥാന കമ്മിറ്റി അംഗം എന്നീ സ്ഥാനങ്ങള്‍ വഹിച്ചു.

1987 നിയമസഭ തെരഞ്ഞെടുപ്പില്‍ അഴീക്കോട് മണ്ഡലത്തില്‍ പാണക്കാട് തങ്ങള്‍ പ്രഖ്യാപിച്ച യു.ഡി.എഫ്​ സ്ഥാനാര്‍ഥി മൗലവിയായിരുന്നു. നാമനിർദേശപത്രിക സമർപ്പിച്ച്​ പ്രചാരണം തുടങ്ങിയ ശേഷം​ സി.പി.എം വിട്ട്​ യു.ഡി.എഫിലേക്ക്​ വന്ന എം.വി. രാഘവന്​ വേണ്ടി സീറ്റ്​ ​ഒഴിഞ്ഞുകൊടുക്കുകയായിരുന്നു. കണ്ണൂര്‍ സ്പിന്നിംഗ് മില്‍, കയര്‍ഫെഡ് എന്നിവയുടെ ഡയറക്ടറും ഹാന്‍വീവി​െൻറയും ടെക്‌സ്​റ്റൈല്‍ കോര്‍പറേഷ​‍െൻറയും ചെയര്‍മാനുമായിരുന്നു. മാടായി ഡിവിഷനിൽനിന്ന്​ ഓരോ തവണ വീതം കണ്ണൂര്‍ ജില്ല കൗണ്‍സിലിലേക്കും ജില്ല പഞ്ചായത്തിലേക്കും തെരഞ്ഞെടുക്കപ്പെട്ടു.

2006ല്‍ പെരിങ്ങളം നിയോജകമണ്ഡലത്തില്‍നിന്ന് നിയമസഭയിലേക്ക് മത്സരിച്ചെങ്കിലും കെ.പി. മോഹനനോട് പരാജയപ്പെട്ടു.

1942 ജൂലൈ 15ന് മുഹമ്മദി​െൻറയും വാഴയില്‍ മറിയത്തി​െൻറയും മകനായി ജനിച്ച മൗലവി 1970 മുതല്‍ 27 വര്‍ഷക്കാലം അഴീക്കല്‍ കിഫായത്തുല്‍ ഇസ്​ലാം മദ്​റസ സ്‌കൂളില്‍ അറബി അധ്യാപകനായിരുന്നു. ബീഫാത്തുവാണ് ഭാര്യ. റയീസ ഏക മകളാണ്. മരുമകൻ: എസ്.എ.പി ഇസ്മായീല്‍. സഹോദരങ്ങൾ: പരേതരായ ബീഫാത്തു, അബൂബക്കര്‍.