അഭിരാമി ഇനി സംസ്ഥാനത്തെ ഏറ്റവും പ്രായം കുറഞ്ഞ കോൺ​ഗ്രസ് യൂനിറ്റ്​ കമ്മിറ്റി പ്രസിഡൻറ്​

ചേർത്തല: സംസ്ഥാനത്തെ ഏറ്റവും പ്രായം കുറഞ്ഞ കോൺ​ഗ്രസ് യൂനിറ്റ്​ കമ്മിറ്റി പ്രസിഡൻറായി​ 19കാരി അഭിരാമി. പട്ടണക്കാട് മണ്ഡലം 21ാം ബൂത്തിലെ കോൺഗ്രസ്​ യൂനിറ്റായ (സി.യു.സി-4) വന്ദേമാതരം കമ്മിറ്റിയിലാണ്​ അഭിരാമി പ്രസിഡൻറായത്​. പട്ടണക്കാട് പഞ്ചായത്ത് പ്രസിഡൻറ്​ സുജിതാ ദിലീപി​െൻറ ബൂത്താണിത്​.

പട്ടണക്കാട് അനന്തുഭവനിൽ അജി-ഷീബ ദമ്പതികളുടെ മകളായ അഭിരാമി പള്ളിപ്പുറം എൻ.എസ്​.എസ്​ കോളജ്​ ബി.എ ഇക്കണോമിക്​സ്​ വിദ്യാർഥിനിയാണ്​​. കലാലയ രാഷ്​ട്രീയത്തിലൂടെയാണ്​ പാർട്ടി പ്രവർത്തനം തുടങ്ങിയത്​.

എറണാകുളത്ത് സ്വകാര്യ കമ്പനി ജീവനക്കാരനായ പിതാവി​െൻറ പാത പിന്തുടർന്നാണ് കോൺ​ഗ്രസിലെത്തിയത്. കൂടുതൽ യുവതി യുവാക്കളെ കോൺഗ്രസിൽ എത്തിക്കുകയാണ്​ ലക്ഷ്യമെന്നും നിർധന രോഗികൾക്ക്​ സാന്ത്വനമേകാനും പാവപ്പെട്ട ജനങ്ങളെ അർഹിക്കുന്ന അംഗീകാരം നൽകി മുൻനിരയിലെത്തിക്കാനും പ്രവർത്തിക്കുമെന്നും​ അഭിരാമി 'മാധ്യമ'ത്തോട്​ പറഞ്ഞു.

കെ.പി.സി.സി പ്രസിഡൻറ്​ കെ. സുധാകരൻ, ഡി.സി.സി പ്രസിഡൻറ്​ ബി. ബാബുപ്രസാദ്​, കെ.സി. വേണുഗോപാൽ എം.പി എന്നിവർ ഫോണിൽ വിളിച്ച്​ അഭിനന്ദനം അറിയിച്ചു. സമൂഹ മാധ്യമങ്ങളിലും അഭിനന്ദനപ്രവാഹമാണ്​.