ഭാര്യാമാതാവിനെ വെട്ടിക്കൊലപ്പെടുത്തിയ പ്രതി അറസ്റ്റിൽ

ചെറുതോണി: ഇടുക്കി വാത്തിക്കുടിയിൽ ഭാര്യാമാതാവിനെ വെട്ടിക്കൊലപ്പെടുത്തിയ പ്രതി അറസ്റ്റിൽ. വാത്തിക്കുടി സ്വദേശി ആമ്പക്കാട്ട് ഭാസ്കരന്റെ ഭാര്യ രാജമ്മ (58) കൊല്ലപ്പെട്ട സംഭവത്തിൽ മകളുടെ ഭർത്താവ്​ പണിക്കൻകുടി കുന്നുംപുറത്ത്​ സുധീഷാണ്​​ (33)​ അറസ്റ്റിലായത്​. ഗുരുതര പരിക്കേറ്റ ഭാസ്കരൻ തൊടുപുഴയിൽ സ്വകാര്യ ആശുപത്രിയിൽ ചികിത്സയിലാണ്​.

സുധീഷും ഭാര്യയും തമ്മിൽ വഴക്കിടുന്നതിനിടെ തടസ്സം പിടിക്കാൻ എത്തിയതായിരുന്നു ഭാസ്കരനും ഭാര്യയും. മദ്യലഹരിയിലായിരുന്ന സുധീഷ് ഇതിനിടെ കോടാലികൊണ്ട്​ ഇരുവരെയും ആക്രമിക്കുകയായിരുന്നു. ഗുരുതര പരിക്കേറ്റ രാജമ്മ തൽക്ഷണം മരിച്ചു. പരിക്കേറ്റ ഭാസ്കരൻ അപകടനില തരണം ചെയ്തിട്ടില്ല. കൃത്യത്തിന് ശേഷം വാഹനവുമായി കടന്ന സുധീഷിനെ ഞായറാഴ്ച പുലർച്ച പണിക്കൻകുടിയിലെ വീടിന് സമീപത്തുനിന്നാണ് പിടികൂടിയത്. തെളിവെടുപ്പിന്​ ശേഷം പ്രതിയെ തിങ്കളാഴ്ച കോടതിയിൽ ഹാജരാക്കും.