നടിയെ ആക്രമിച്ച കേസ്: അന്വേഷണ ഉദ്യോഗസ്ഥന്​ ഹൈകോടതി നോട്ടീസ്​

കൊച്ചി: നടിയെ ആക്രമിച്ച കേസിലെ അന്വേഷണ ഉദ്യോഗസ്ഥൻ ബൈജു പൗലോസിന്​ ഹൈകോടതി നോട്ടീസ്​. നടിയെ ആക്രമിച്ച കേസിൽ വ്യാജ മൊഴി നൽകാൻ അന്വേഷണ ഉദ്യോഗസ്ഥൻ ഭീഷണിപ്പെടുത്തുന്നുവെന്നാരോപിച്ച് കേസിലെ സാക്ഷിയും കാവ്യ മാധവന്റെ സഹോദരന്റെ ലക്ഷ്യ എന്ന സ്ഥാപനത്തിലെ മുൻ ജീവനക്കാരനുമായ ആലപ്പുഴ സ്വദേശി സാഗർ വിൻസന്റ്​ നൽകിയ ഹരജിയിലാണ്​ നോട്ടീസ്​.

തുടരന്വേഷണത്തിന്‍റെ ഭാഗമായി അന്വേഷണ സംഘം നോട്ടീസ് നൽകിയിട്ടുണ്ടെന്നും ഇതിലെ തുടർ നടപടികൾ സ്റ്റേ ചെയ്യണമെന്നുമാണ്​ ഹരജിയിലെ ആവശ്യം. മൊഴി മാറ്റി പറയാനായി ദ്രോഹിക്കുമെന്ന് ആശങ്കയുള്ളതായും ഹരജിയിൽ ചൂണ്ടിക്കാട്ടുന്നു.