ഹരജിയിൽ പേരിന്​ പകരം ‘എക്​സ്​’ രേഖപ്പെടുത്തിയ നടപടിക്ക്​ ഹൈകോടതി അംഗീകാരം

കൊച്ചി: നടൻ പ്രതിയായ കേസി​​​െൻറ വിചാരണക്ക്​ വനിത ജഡ്​ജി വേണമെന്ന്​ ആവശ്യപ്പെട്ട്​ കോടതിയെ സമീപിച്ച ആക്രമിക്കപ്പെട്ട യുവനടി പേരിന്​ പകരം ഹരജിയിൽ ‘എക്‌സ്’ എന്ന്​ രേഖപ്പെടുത്തിയ​ നടപടിക്ക്​ ഹൈകോടതി അംഗീകാരം. ഹരജിക്കൊപ്പം  മുദ്രവെച്ച കവറിൽ നൽകിയ പേരും വിലാസവുമടക്കമുള്ള വിവരങ്ങൾ സുരക്ഷിതമായി സൂക്ഷിക്കണമെന്ന നിർദേശത്തോടെ കോടതി രജിസ്​ട്രിക്ക്​ കൈമാറി.

കേസി​​​െൻറ വിചാരണ വനിത ജഡ്ജിയുള്ള കോടതിയിലേക്ക് മാറ്റണമെന്നും കഴിയുമെങ്കിൽ തൃശൂർ ജില്ലയിലെ ഉചിതമായ കോടതി കേസ് പരിഗണിക്കണമെന്നുമാവശ്യപ്പെട്ടാണ് നടി ഹരജി നൽകിയത്. പ്രിൻസിപ്പൽ സെഷൻസ് കോടതി ആവശ്യം തള്ളിയതിനെ തുടർന്നാണ്​ ഹൈകോടതിയെ സമീപിച്ചത്​. 

പീഡനക്കേസുകളിലെ ഇരകളുടെ പേര് ഹൈകോടതിയിൽ നൽകുന്ന ഹരജിയിൽ രേഖപ്പെടുത്താമെങ്കിലും കോടതി രേഖകളിലോ വിധിയിലോ പേരും ആളെ തിരിച്ചറിയുന്ന വിവരങ്ങളുമുണ്ടാകരുതെന്ന് ഉറപ്പാക്കാൻ അടുത്തിടെ ഹൈകോടതി സർക്കുലർ ഇറക്കിയിരുന്നു. എന്നാൽ, ഹരജിയിൽപോലും പേരു​െവക്കാതെ പേരും വിലാസവുമുൾപ്പെടെയുള്ള വിവരങ്ങളും സത്യവാങ്മൂലവും  മുദ്രവെച്ച കവറിൽ വേറെ നൽകുകയും ചെയ്​ത നടപടി കൂടുതൽ ഫലപ്രദവും നവീനവുമാണെന്ന് വിലയിരുത്തിയാണ് സിംഗിൾ ബെഞ്ച് അംഗീകരിച്ചത്.