ശബരിമല യോഗത്തിൽ നിന്ന് എ.ഡി.ജി.പി അജിത് കുമാർ ഔട്ട്; മാറി നിൽക്കാൻ ആവശ്യപ്പെട്ടത് മുഖ്യമന്ത്രി

തിരുവനന്തപുരം: ശബരിമല തീർഥാടനത്തിന്റെ മുന്നൊരുങ്ങളുമായി ബന്ധപ്പെട്ട് വിളിച്ചു ചേർത്ത യോഗത്തിൽ എ.ഡി.ജി.പി എം.ആർ. അജിത് കുമാറിനെ പങ്കെടുപ്പിച്ചില്ല. മുഖ്യമന്ത്രിയുടെ നേതൃത്വത്തിൽ ചേർന്ന മണ്ഡല മകരവിളക്ക് മഹോത്സവ മുന്നൊരുങ്ങളുടെ അവലോകന യോഗത്തിലാണ് എ.ഡി.പി.യെ മാറ്റിനിർത്തിയത്. ക്രമസമാധാന ചുമതലയുള്ള അജിത് കുമാറിനാണ് നിലവിൽ ശബരിമല കോ-ഓർഡിനേറ്ററുടെ ചുമതലയും.

മുഖ്യമന്ത്രിയുടെ ഓഫിസ് ഇടപെട്ട് അജിത് കുമാറിനോട് യോഗത്തിൽ നിന്ന് മാറിനിൽക്കാൻ ആവശ്യപ്പെടുകയായിരുന്നു എന്നാണ് റിപ്പോർട്ട്. അജിത് കുമാറിനെതിരെ വിവാദങ്ങളുയർന്ന സാഹചര്യത്തിലാണ് മുഖ്യമന്ത്രിയുടെ ഓഫിസ് യോഗത്തിൽ നിന്ന് മാറ്റിനിർത്തിയത്. എ.ഡി.ജി.പിക്ക് പകരം ഡി.ജി.പി ശൈഖ് ദർവേശ് സാഹിബാണ് യോഗത്തിൽ ​കാര്യങ്ങൾ വിശദീകരിച്ചത്. മന്ത്രി വി.എൻ. വാസവൻ, ചീഫ് സെക്രട്ടറി ശാരദ മുരളീധരൻ എന്നിവരും പ​ങ്കെടുത്തു.

ഇത്തവണ ഓൺലൈൻ ബുക്കിങ് വഴിയാണ് തീർഥാടകർക്ക് ശബരി മലയിലേക്ക് പ്രവേശനം നൽകുക. പ്രതിദിനം പരമാവധി 80,000 പേർക്ക് മാത്രമാണ് സന്നിധാനത്തേക്ക് പ്രവേശനം നൽകുകയുള്ളൂ.