കൈയേറിയ ഭൂമി പിടിച്ചെടുത്ത്​ പതിച്ചു കൊടുക്കാൻ കാര്യക്ഷമതയില്ല; ഇടത് സർക്കാറിനെതിരെ എ.കെ. ബാലൻ

തിരുവനന്തപുരം: കൈയേറ്റ ഭൂമി തിരിച്ചു പിടിച്ച്​ പതിച്ചു കൊടുക്കാത്തതിൽ സർക്കാറിനെതിരെ ആഞ്ഞടിച്ച്​ സി.പി.എം കേന്ദ്രകമ്മിറ്റി അംഗം എ.കെ. ബാലൻ. കേരളീയം പരിപാടിയിൽ റവന്യൂ വകുപ്പ്​ സംഘടിപ്പിച്ച ‘കേരളത്തിലെ ഭൂപരിഷ്കരണം’ സെമിനാറിലാണ്​ തോട്ടഭൂമിയുടെ ഇളവിൽ കൈവശം വെച്ച ഭൂമി തിരിച്ചു പിടിക്കാൻ സർക്കാർ എന്ത്​ നടപടിയെടുത്തെന്ന ചോദ്യം ഉന്നയിച്ചത്​.

മുൻ റവന്യൂ പ്രിൻസിപ്പൽ സെ​ക്രട്ടറി നിവേദിത പി. ഹരൻ ഉൾപ്പെടെയുള്ളവർ ഇതുസംബന്ധിച്ച്​ സമർപ്പിച്ച റിപ്പോർട്ട്​ എന്തായി. മുൻ ക്രൈംബ്രാഞ്ച്​ ഐ.ജി എസ്​. ശ്രീജിത്​ നടത്തിയ അന്വേഷണത്തിൽ അഞ്ച് ലക്ഷം ഹെക്ടർ ഭൂമി ഇങ്ങനെ കൈവശം വെച്ചതായി കണ്ടെത്തിയിരുന്നു. ഇതിന്‍റെ തുടർച്ചയായി 50 കേസ്​ രജിസ്റ്റർ ചെയ്​തെങ്കിലും അതിലൊന്നും തുടർനടപടി ഉണ്ടായില്ല. ഭൂമി കൈയേറ്റവുമായി ബന്ധപ്പെട്ട്​ ഇങ്ങനെ നിരവധി റിപ്പോർട്ടുകൾ സർക്കാറിന്​ മുന്നിലുണ്ട്​. തെറ്റാണെങ്കിൽ തള്ളുക, വസ്തുതയാണെങ്കിൽ തുടർനടപടി സ്വീകരിക്കുക -എ.കെ. ബാലൻ പറഞ്ഞു.

ഭൂമി നിയമവിരുദ്ധമായി കൈവശം വെച്ച വൻകിട ​തോട്ടം ഉടമകൾക്കെതിരെ കർശന നടപടി സ്വീകരിച്ച്​​ അത്തരം ഭൂമി തിരിച്ചു പിടിച്ച്​ ഭൂരഹിതർക്ക്​ കൈമാറുമെന്നാണ്​​​ ഇടതു മുന്നണി പ്രകടന പത്രികയിലെ 378ാം ഇനം. ഈ നിലയിൽ ശക്തമായ നിലപാട്​ സ്വീകരിക്കണം. ഭൂമിയില്ലാത്തതല്ല കേരളത്തിന്‍റെ പ്രശ്നം. കൈയേറിയ ഭൂമി പിടിച്ചെടുത്ത്​ അർഹർക്ക്​ പതിച്ചു കൊടുക്കുന്നതിൽ കാര്യക്ഷമതയില്ലെന്നും ബാലൻ കുറ്റപ്പെടുത്തി.