ബി.പി.എൽ വിദ്യാർഥികൾക്ക് സമ്പൂർണ്ണ യാത്ര സൗജന്യം പരിഗണനയിലെന്ന് ആന്റണി രാജു

തിരുവനന്തപുരം: വിദ്യാർഥിയാത്രനിരക്ക്​ വർധനയെ പരസ്യമായി പിന്തുണച്ച്​ ആന്‍റണി രാജുവിന്‍റെ വിവാദ പ്രസ്താവന. 'രണ്ട്​ രൂപ കൺസഷൻ കൊടുക്കുന്നുവെന്നത്​ വിദ്യാർഥികൾക്ക്​ പോലും നാണക്കേടാണ്, ​അവർ​ പോലും അഞ്ച്​ രൂപ കൊടുത്തിട്ട്​ ബാക്കി വാങ്ങിക്കാറില്ലെന്നാ'യിരുന്നു മന്ത്രിയുടെ പ്രതികരണം. സംഭവം വിവാദമാവുകയും എസ്​.എഫ്​.ഐ അടക്കം കടുത്ത വിമർശനവുമായി രംഗത്തെത്തുകയും ചെയ്​തതോടെ ​മന്ത്രി നിലപാട്​ തിരുത്തി.

തന്‍റെ വാക്കുകൾ അടർത്തിയെടുത്തതാണെന്നും നിലവിലെ കൺസഷൻ തുക വിദ്യാർഥികൾക്ക്​ നാണക്കേടാണെന്ന്​ താൻ പറഞ്ഞിട്ടില്ലെന്നുമായിരുന്നു മന്ത്രിയുടെ മലക്കംമറിച്ചിൽ. വിദ്യാർഥിയാത്രനിരക്ക്​ വർധിപ്പിക്കുന്നത്​ സംബന്ധിച്ച്​ വിദ്യാർഥിസംഘടനകളിൽനിന്നടക്കം പ്രതിഷേധമുയരുന്നതിനിടെയാണ്​ ഞായറാഴ്ച രാവിലെ മന്ത്രിയുടെ വിവാദ പരാമർശം.

നിലവിലെ നിരക്ക്​ 2012ൽ ആരംഭിച്ചതാണെന്നും 10​ വർഷമായി രണ്ട്​ രൂപ നൽകുന്നത്​ വിദ്യാർഥികൾക്കുതന്നെ മനഃപ്രയാസമുണ്ടാക്കുന്ന കാര്യമാണെന്നുമായിരുന്നു മന്ത്രി മാധ്യമങ്ങളോട്​ പറഞ്ഞത്​. ഏറ്റവും കൂടുതൽ വിദ്യാർഥികൾ ആശ്രയിക്കുന്നത്​ പ്രൈവറ്റ്​ ബസുകളെയാണ്​. സ്​കൂൾ സമയങ്ങളിൽ മറ്റ്​ യാത്രക്കാരെക്കാൾ കൂടുതൽ വിദ്യാർഥികളുമാണ്​. സ്വകാര്യ ബസുകൾക്ക്​ വരുമാനം വളരെ കുറയുന്നത്​ വിദ്യാർഥികളുടെ കുറഞ്ഞ നിരക്ക്​ മൂലമാണെന്നാണ്​ അവർ പറയുന്നത്​. അത്​ ഒരു പരിധി വരെ ന്യായവുമാണ്​. നിരക്ക്​ വർധന നടത്തിയിട്ട്​ 10​ വർഷം പിന്നിട്ടിരിക്കുന്നുവെന്നും ആറ്​ രൂപയായി കൺസഷൻ ഉയർത്തണമെന്നതാണ്​ ബസുടമകളുടെ ആവശ്യമെന്നും അദ്ദേഹം രാവിലെ പറഞ്ഞു. വിദ്യാർഥി സംഘടനകളൊക്കെ ഒറ്റക്കൊറ്റക്ക്​​ കാണുമ്പോൾ 'വർധന ശരിയാണെ'ന്ന്​ പറയുമെങ്കിലും എല്ലാവരുടെയും യോഗം വിളിക്കു​മ്പോൾ അഭിപ്രായ വ്യത്യാസം രേഖപ്പെടുത്തുകയാണെന്ന വിമർശനം കൂടി അദ്ദേഹം ഉന്നയിച്ചു.

തന്‍റെ മുഴുവൻ പ്രസ്താവന എടുത്ത്​ നോക്കിയാൽ നാണക്കേടുണ്ടാകില്ലെന്ന ആമുഖത്തോടെയാണ്​ വൈകുന്നേരം പ്രസ്താവന തിരുത്തിയത്​. എസ്​.എഫ്​.ഐ നേതാക്കളുമായി സംസാരിക്കും. കെ.എസ്​.യു നിലപാട്​ രാഷ്ട്രീയപ്രേരിതമാണ്​. ഏറ്റവും ഒടുവിൽ വിദ്യാർഥിനിരക്ക്​ ഇരട്ടിയാക്കിയത്​ ഉമ്മൻ ചാണ്ടി മുഖ്യമന്ത്രിയായിരുന്ന കാലത്താണെന്നും മന്ത്രി പറഞ്ഞു. വിദ്യാർഥികൾക്ക്​ ദോഷകരമാവാതെ നിരക്ക്​ വർധിപ്പിക്കാനാണ്​ നോക്കുന്നതെന്നും ബി.പി.എൽ വിദ്യാർഥികൾക്ക്​ സമ്പൂർണ സൗജന്യയാത്ര പരിഗണനയിലാണെന്നുകൂടി പറഞ്ഞ്​ മന്ത്രി നിലപാട്​ മയപ്പെടുത്തുകയും ചെയ്തു.