ആറന്മുള വിമാനത്താവള ഭൂമി കൈമാറ്റം അസാധുവാക്കി

തിരുവനന്തപുരം: ആറന്മുള വിമാനത്താവളപദ്ധതിക്ക് കെ.ജി.എസ്​ ഗ്രൂപ്പുമായി നടത്തിയ ഭൂമി കൈമാറ്റങ്ങൾ അസാധുവാക്കി ലാൻഡ് ബോർഡ് ഉത്തരവിറക്കി. കോഴഞ്ചേരി താലൂക്ക് എജുക്കേഷനൽ സൊസൈറ്റി, ചാരിറ്റബിൾ എജുക്കേഷനൽ ആൻഡ് വെൽഫെയർ സൊസൈറ്റി എന്നിവയുടെ ചെയർമാനായ എബ്രഹാം കലമണ്ണിൽ കെ.ജി.എസ്​ ഗ്രൂപ്പുമായി നടത്തിയ ഭൂമി കൈമാറ്റമാണ് റദ്ദാക്കപ്പെട്ടത്. ഇതോടെ 293.30 ഏക്കർ സ്​ഥലം മിച്ചഭൂമിയായി.

കോഴഞ്ചേരി, അടൂർ, ആലത്തൂർ താലൂക്കുകളിലായുള്ള 293.30 ഏക്കർ സ്​ഥലത്തി​​െൻറ കൈമാറ്റമാണ് റദ്ദാക്കിയത്. ഏഴ് ദിവസത്തിനുള്ളിൽ ഈ സ്​ഥലം മിച്ചഭൂമിയായി സർക്കാറിലേക്ക് നിക്ഷിപ്തമാക്കുമെന്ന് കോഴഞ്ചേരി താലൂക്ക് ലാൻഡ് ബോർഡ് ചെയർമാനും പത്തനംതിട്ട എ.ഡി.എമ്മുമായ അനു എസ്.​ നായരുടെ ഉത്തരവിൽ വ്യക്​തമാക്കുന്നു. ഭൂമിയുടെ ഉടമസ്​ഥാവകാശം വ്യത്യസ്​ത സൊസൈറ്റികൾക്കാണെങ്കിലും ഇവയിലെ അംഗങ്ങൾ എബ്രഹാം കലമണ്ണി​​െൻറ കുടുംബാംഗങ്ങളാണെന്ന് ലാൻഡ് ബോർഡ് കണ്ടെത്തി. വ്യത്യസ്​ത സൊസൈറ്റികളുടെ പേരിൽ മിച്ചഭൂമി കേസ്​ എടുക്കാനാവില്ലെന്ന എതിർവാദം തള്ളിയാണ് ലാൻഡ് ബോർഡി​​െൻറ തീരുമാനം. നിയമാനുസൃതം 12.14 ഹെക്ടർ സ്​ഥലത്തിന് എബ്രഹാം കലമണ്ണിലിന് ഇളവ് ലഭിക്കും. 

ആറന്മുള വിമാനത്താവളവുമായി ബന്ധപ്പെട്ട നടപടികൾ തുടരേണ്ടതില്ലെന്ന സർക്കാർ തീരുമാനം കൂടി പരിഗണിച്ചാണ് കെ.ജി.എസ്​ ഗ്രൂപ്പുമായുള്ള ഭൂമികൈമാറ്റം റദ്ദ് ചെയ്യുന്നതിനുള്ള തീരുമാനം. 2012ൽ ലാൻഡ് ബോർഡ് മിച്ചഭൂമി കേസ്​ രജിസ്​റ്റർ ചെയ്തിരുന്നെങ്കിലും ഹൈകോടതി റദ്ദാക്കിയിരുന്നു. ബന്ധപ്പെട്ട കക്ഷികളുടെ വാദം ലാൻഡ് ബോർഡ് കേൾക്കണമെന്നും ഹൈകോടതി നിർദേശിച്ചിരുന്നു. ഈവർഷം പുനഃസംഘടിപ്പിച്ച ലാൻഡ് ബോർഡ് മാർച്ച് 30ന് ചേർന്ന പ്രഥമ സിറ്റിങ്ങിലാണ് പുതിയ കേസ്​ രജിസ്​റ്റർ ചെയ്തത്.