അരിക്കൊമ്പന്‍ കേസ്: മദ്രാസ്‌ ഹൈകോടതി വിധിന്യായം ചൂണ്ടിക്കാട്ടി ജോസ് കെ. മാണിയുടെ സത്യവാങ്​മൂലം

കോട്ടയം: അരിക്കൊമ്പന്‍ വിഷയം കേരള ഹൈകോടതി വ്യാഴാഴ്ച പരിഗണിക്കാനിരിക്കെ 2019ല്‍ അപകടകാരിയായ ആനയെ പിടിക്കുന്നതിന് മദ്രാസ് ഹൈകോടതി പുറപ്പെടുവിച്ച വിധിന്യായം ചൂണ്ടിക്കാട്ടി കേരള കോണ്‍ഗ്രസ് എം ചെയര്‍മാന്‍ ജോസ് കെ. മാണി സത്യവാങ്​മൂലം ഫയല്‍ ചെയ്തു.

ചിന്നക്കനാല്‍ ഉള്‍പ്പെടെ പ്രദേശങ്ങളില്‍ ഭീതിപടര്‍ത്തിക്കൊണ്ടിരിക്കുന്ന അരിക്കൊമ്പന്‍ വിഷയത്തില്‍ കേരള ഹൈകോടതിയുടെ സ്വമേധയാ ഉള്ള കേസില്‍ ജോസ് കെ. മാണി കക്ഷി ചേര്‍ന്നിരുന്നു.

കേരളമെമ്പാടും നടന്ന വന്യജീവി ആക്രമണങ്ങളുടെ വിശദാംശങ്ങളും വന്യജീവി ആക്രമണങ്ങളില്‍നിന്ന്​ മനുഷ്യന് ലഭിക്കേണ്ട സംരക്ഷണം കാലോചിതമായി നടപ്പാക്കാത്തതിനാല്‍ സംഭവിക്കുന്ന ബുദ്ധിമുട്ടുകളും കേസില്‍ കക്ഷിചേര്‍ന്ന്​ ജോസ് കെ. മാണി ചൂണ്ടിക്കാട്ടിയിരുന്നു. 2018നും 2022നുമിടയില്‍ 105 മനുഷ്യജീവനുകളാണ് കാട്ടാന ആക്രമണത്തില്‍ പൊലിഞ്ഞത്.