വീട്ടുജോലിക്കാരിയെ പീഡിപ്പിച്ച കേസിൽ 75കാരനായ ഹോർട്ടികോർപ് മുൻ എം.ഡി അറസ്‌റ്റിൽ

കൊച്ചി: വീട്ടിൽ ജോലിക്ക്​ നിന്ന ഒഡിഷ സ്വദേശിനിയെ പീഡിപ്പിച്ച കേസിൽ ഹോർട്ടികോർപ് മുൻ എം.ഡി കെ. ശിവപ്രസാദിന്‍റെ (75) അറസ്‌റ്റ്‌ രേഖപ്പെടുത്തി. കഴിഞ്ഞദിവസം കീഴടങ്ങിയ ശിവപ്രസാദ്​ ദേഹാസ്വാസ്ഥ്യത്തെ തുടർന്ന് മെഡിക്കൽ ട്രസ്റ്റ് ആശുപത്രിയിൽ ചികിത്സയിലായിരുന്നു. തിങ്കളാഴ്ച രാവിലെ 11ന്‌ ഡിസ്‌ചാർജ്‌ ചെയ്‌തതിനെ തുടർന്നാണ്‌ അറസ്‌റ്റ്‌ ചെയ്‌തത്‌. പ്രാഥമിക തെളിവെടുപ്പിന്​ ശേഷം ഇയാളെ കോടതിയിൽ ഹാജരാക്കി റിമാൻഡ്‌ ചെയ്‌തു.

25 ദിവസത്തിലധികം ഒളിവിൽ കഴിഞ്ഞ പ്രതി പൊലീസ്​ ലുക്കൗട്ട്‌ നോട്ടീസ്​ ഇറക്കിയതിന്​ പിന്നാലെ ശനിയാഴ്ചയാണ്​ എറണാകുളം എ.സി.പി ഓഫിസിൽ കീഴടങ്ങിയത്‌. ശീതളപാനീയത്തിൽ ലഹരിപദാർഥം കലർത്തി നൽകിയ ശേഷം പീഡിപ്പിച്ചെന്നാണ് കേസ്. മുമ്പും തന്നെ പീഡിപ്പിച്ചതായി യുവതി പരാതി നൽകിയിട്ടുണ്ട്​. രണ്ട്‌ കേസുകളും എറണാകുളം എ.സി.പി പി. രാജ്‌കുമാറിന്‍റെ നേതൃത്വത്തിലാണ്‌ അന്വേഷിക്കുന്നത്‌.

കഴിഞ്ഞ ഒക്‌ടോബർ 15നാണ്​ കേസിനാസ്‌പദമായ സംഭവം. പൊലീസ്‌ കേസെടുത്തതോടെ ശിവപ്രസാദ്‌ ഒളിവിൽ പോവുകയായിരുന്നു. ദേശീയ പട്ടികവർഗ കമീഷൻ സ്വമേധയാ കേസെടുത്തിരുന്നു.