കുടുംബബന്ധങ്ങള്‍ക്ക് മാതൃകയാക്കണം

കുടുംബബന്ധങ്ങള്‍ എങ്ങനെയായിരിക്കണമെന്നാണ് രാമായണത്തിലൂടെ നമ്മെ പഠിപ്പിക്കുന്നത്. ജ്യേഷ്ഠത്തിയെ അമ്മയെപ്പോലെ കാണണമെന്നും അച്ഛനെ ബഹുമാനിക്കണമെന്നും ഭരണാധികാരികള്‍ എങ്ങനെയായിരിക്കണമെന്നുമൊക്കെ നൂറ്റാണ്ടുകള്‍ക്ക് മുമ്പുതന്നെ രാമായണത്തിലൂടെ അറിയിച്ചിരുന്നു. അച്ഛ​​​െൻറ ശപഥമായിരുന്നല്ലോ രാമന്​ 14 വര്‍ഷം വനവാസത്തിനുപോകേണ്ടിവന്നത്. അച്ഛ​​​െൻറ വാക്ക് മനസാ സ്വീകരിച്ച്, ഒരെതിര്‍പ്പും പറയാതെ രാജ്യം ഉപേക്ഷിക്കുകയായിരുന്നു. രാജാവാകാനുള്ള എല്ലാ കാര്യങ്ങൾക്കും ഒരുങ്ങിയിരിക്കുമ്പോഴാണ് വനവാസത്തിന് പോകുന്നത്. 

അതുപോലെ തന്നെ രാമന്‍ രാജ്യം ഭരിച്ചിരുന്നത് ഒരു മാതൃകയാക്കണം. രാമരാജ്യം എന്നത് രാമ​​​െൻറ ഭരണത്തിനധിഷ്ഠിതമെന്നാണ്. പ്രജാഹിതമനുസരിച്ചായിരുന്നു. അതുകൊണ്ടുതന്നെയല്ലേ സീതയെ ഉപേക്ഷിക്കേണ്ടിവന്നത്. ഒരാളും  ഭാര്യയെപോലും  കുറ്റംപറയാന്‍ പാടില്ല. അത് ശരിയോ തെറ്റോ എന്നല്ല. ഇപ്പോള്‍ എന്തെല്ലാം കുറ്റംപറഞ്ഞാലും എത്ര തെറ്റുചെയ്താലും ഭരണത്തില്‍ തൂങ്ങിക്കിടക്കുന്ന അവസ്ഥയാണ്. ഇന്നത്തെ ലോകത്തിന് എല്ലാ മാതൃകകളും കാണിച്ചുകൊടുക്കുകയാണ് രാമായണം. ശരിക്കും അതി​​​െൻറ ഉള്ളില്‍ അടങ്ങിയിരിക്കുന്ന തത്ത്വങ്ങള്‍ ജനങ്ങളിലേക്ക് വരുന്നില്ല.

ഒരു നോവലുവായിച്ചുപോകുന്നതുപോലെയൊന്നും രാമായണം വായിച്ചുപോകാനാകില്ല. യഥാർഥത്തില്‍ ബന്ധങ്ങളെക്കുറിച്ചാണ് രാമായണം നമ്മെ പഠിപ്പിക്കുന്നത്. ഇന്നിപ്പോള്‍ പീഡനങ്ങള്‍ നമ്മള്‍ കേള്‍ക്കുമ്പോള്‍ ഒരാളെയും വിശ്വസിക്കാന്‍ പറ്റാത്ത സാഹചര്യമാണ്. അന്ന് സീതാദേവിയുടെ ആഭരണങ്ങള്‍ കാണിച്ചപ്പോള്‍ ദിവസവും കാലുവണങ്ങുന്ന ലക്ഷ്​മണന് ജ്യേഷ്ഠത്തിയുടെ ആ ആഭരണം മനസ്സിലാക്കാന്‍ സാധിച്ചില്ല. കാലില്‍ കിടക്കുന്ന പാദസരം മാത്രമേ അദ്ദേഹം കണ്ടിട്ടുള്ളൂ. അത്രമാത്രം ബഹുമാനിച്ചിരുന്നു. രാമായണത്തിലെ ഒാരോന്നും വായിച്ച് നോക്കുമ്പോഴും ഇന്നത്തെ ലോകവുമായി തട്ടിച്ചുനോക്കാനാകില്ല. നമ്മുടെ കുടുംബബന്ധങ്ങള്‍ രാമായണത്തിലൂടെ മാതൃകയാക്കണം. കൂടാതെ, മന്ത്രിമാര്‍ പ്രജകളുടെ ഇഷ്​ടമനുസരിച്ച്​ ഭരിക്കുന്നവരായിരിക്കണം.