തൊഴിലും തൊഴിലാളിയും വിരൽത്തുമ്പിൽ; ‘ഭായ്​ ലോഗ്’​ ആപ്​ തയാർ

തിരുവനന്തപുരം: തൊഴിൽ തേടി അതിഥിത്തൊഴിലാളികൾക്ക്​ ഇനി തെരുവിൽ അലയേണ്ട; വിശ്വസ്തതയുള്ള തൊഴിലാളിക്കായി തൊഴിലുടമക്കും ബുദ്ധിമുട്ടേണ്ട. ഇരുവിഭാഗത്തിനും ആവശ്യാനുസരണം തൊഴിലും തൊഴിലാളിയെയും വിരൽത്തുമ്പിൽ ലഭ്യമാക്കുന്ന ആപ്​​ വിദ്യാർഥികളുടെ സ്റ്റാർട്ടപ്​ സംരംഭമായി പുറത്തിറങ്ങി. കൊല്ലം ടി.കെ.എം എൻജിനീയറിങ്​ കോളജ്​ പൂർവ വിദ്യാർഥികളായ ആസിഫ് അയൂബും, ആഷിഖ് ആസാദും, ഗോകുൽ മോഹനും ചേർന്ന് കേരള സ്റ്റാർട്ടപ് മിഷന്റെ പിന്തുണയോടെ 2023 ൽ സ്ഥാപിച്ച സ്റ്റാർട്ടപ് കമ്പനിയായ ‘ഭായ് ലോഗ്’ ആണ് ആപിന്റെ ശിൽപികൾ. മുഖ്യമന്ത്രി പിണറായി വിജയൻ ആപിന്‍റെ പ്രകാശനം നിർവഹിച്ചു.

അതിഥിത്തൊഴിലാളികൾക്കും തൊഴിലുടമക്കും ആപിൽ വെവ്വേറെ രജിസ്​ട്രേഷനുണ്ട്​. തൊഴിലാളിയുടെയും തൊഴിലിന്‍റെയും ലൊക്കേഷൻ കൂടി പരിഗണിച്ച്​ തൊഴിലാളിക്കും തൊഴിലുടമക്കും ആപിൽ നോട്ടി​ഫിക്കേഷൻ വരും. തൊഴിലുടമ ആവശ്യമുള്ള തൊഴിലാളിയുടെ വിവരം പോസ്റ്റ്​ ചെയ്താൽ തൊഴിലാളികൾക്ക്​ ഇതുസംബന്ധിച്ച നോട്ടി​ഫിക്കേഷൻ ലഭിക്കും. ​നോട്ടിഫിക്കേഷൻ ലഭിച്ച തൊഴിലിനായി ആപിലൂടെ തൊഴിലാളിക്ക്​ അപേക്ഷിക്കാം. തൊഴിലാളി തൊഴിലിനായി അപേക്ഷിക്കും മുമ്പ്​ ആപിലൂടെ ആധാർ വെരിഫിക്കേഷൻ നടത്തണം. തൊഴിലാളിയുടെ ഫോട്ടോയും വിവരങ്ങളും തൊഴിലുടമക്ക്​ മുൻകൂട്ടി ലഭിക്കും. ആപ്​​ വഴി തന്നെ വേതനവും നൽകാം. ജോലിയുടെ നിലവാരമനുസരിച്ച്​ തൊഴിലാളിക്ക്​ റേറ്റിങ്​ നൽകാൻ തൊഴിലുടമക്കാകും. നേരത്തേ ചെയ്ത ജോലികളുടെ നിലവാരവും ആപിലൂടെ തൊഴിലുടമക്ക്​ പരിശോധിക്കാം.

കേരള സ്റ്റാർട്ടപ് മിഷന്‍റെ ‘ഐഡിയ ഗ്രാന്‍റ്​ 2022’ൽ വിജയികളായി തെരഞ്ഞെടുക്കപ്പെട്ട സ്റ്റാർട്ടപ് സംരംഭം​ ഒരു വർഷ​ത്തോളം സമയമെടുത്താണ്​ വിദ്യാർഥികൾ പൂർത്തിയാക്കിയത്​. സംഘത്തിന്​ ആദ്യഘട്ട ഫണ്ടിങ്​ എന്ന നിലയിൽ സ്റ്റാർട്ടപ് മിഷൻതന്നെ രണ്ടു ലക്ഷം രൂപ നൽകിയിരുന്നു. മറ്റൊരു ഫണ്ടിങ്​ ഏജൻസിയെ കൂടി കണ്ടെത്തിയാണ്​ സംരംഭം പൂർത്തിയാക്കിയത്​. ഗൂഗ്​ൾ പ്ലേ സ്​റ്റോറിൽ ‘Bhai log’ ആപ്​ ദിവസങ്ങൾക്കകം ലഭ്യമാകും. മുഖ്യമന്ത്രിയുടെ ചേംബറിൽ നടന്ന പ്രകാശന ചടങ്ങിൽ മുഖ്യമന്ത്രിയുടെ ഓഫിസർ ഓൺ സ്​പെഷൽ ഡ്യൂട്ടി ഡോ.എസ്. കാർത്തികേയൻ, സ്റ്റാർട്ടപ് മിഷൻ മേധാവി അനൂപ്, അംബിക എന്നിവരും പങ്കെടുത്തു.