അഞ്ച്​ പഞ്ചായത്തിൽക്കൂടി പക്ഷിപ്പനി സ്ഥിരീകരിച്ചു​

ആലപ്പുഴ: തകഴി പഞ്ചായത്തിന്​ പിന്നാലെ അഞ്ച്​ പഞ്ചായത്തിൽക്കൂടി പക്ഷിപ്പനി സ്ഥിരീകരിച്ചതോടെ ജാഗ്രത കടുപ്പിച്ച്​ അധികൃതർ. പക്ഷിപ്പനി മനുഷ്യരിലേക്ക് പകരാതിരിക്കാൻ​ മുന്‍കരുതല്‍ നടപടി ശക്തമാക്കാൻ ആരോഗ്യവകുപ്പിന് കലക്​ടർ നിര്‍ദേശം നല്‍കി. നെടുമുടി, കരുവാറ്റ, കോട്ടയം ജില്ലയിലെ വെച്ചൂർ, അയ്​മനം, കല്ലറ പഞ്ചായത്തുകളിലാണ് പുതുതായി പക്ഷിപ്പനി സ്ഥിരീകരിച്ചത്.

ഈ പഞ്ചായത്തുകളിൽ താറാവുകൾ കൂട്ടത്തോടെ ചത്തതിനെത്തുടർന്ന് സാമ്പിൾ ശേഖരിച്ച് ഭോപാലിലെ നാഷനൽ ഇൻസ്​റ്റിറ്റ്യൂട്ട് ഓഫ് ഹൈ സെക്യൂരിറ്റി അനിമൽ ഡിസീസ് ലാബിൽ പരിശോധന നടത്തി. എച്ച് 5 എൻ1 വിഭാഗത്തിൽപെടുന്ന വൈറസി​െൻറ സാന്നിധ്യമാണ് സാമ്പിളിൽ കണ്ടെത്തിയത്.

ദേശാടനപ്പക്ഷികളിൽനിന്നാകാം രോഗം പിടിപെട്ടതെന്നാണ്​ മൃഗസംരക്ഷണ വകുപ്പ്​ നിഗമനം. ആലപ്പുഴ ജില്ലയിൽ പുറക്കാട് പഞ്ചായത്തിലും താറാ‍വുകൾ കൂട്ടത്തോടെ ചാകുന്നുണ്ട്. ഇവിടെനിന്ന്​ ശേഖരിച്ച സാമ്പിൾ ഫലം വന്നിട്ടില്ല.

അതിവ്യാപനം തടയുന്നതിന്​ നെടുമുടിയിലും കരുവാറ്റയിലും കൂടി താറാവുകളെ കൊന്ന് ദഹിപ്പിക്കുകയാണ്​ (കള്ളിങ്) അധികൃതർ. പക്ഷിപ്പനി സ്ഥിരീകരിച്ച പ്രദേശത്തി​െൻറ ഒരു കിലോമീറ്റർ ചുറ്റളവിലുള്ള വളർത്തുപക്ഷികളെ ഉൾ​െപ്പടെ കള്ളിങ് ചെയ്യും. നെടുമുടിയിൽ 22,803 പക്ഷികളെയും കരുവാറ്റയിൽ 15,875 പക്ഷികളെയുമാണ് മൃഗസംരക്ഷണ വകുപ്പിനുകീഴിലെ റാപിഡ് റെസ്പോൺസ് ടീം കള്ളിങ്ങിന്​ വിധേയമാക്കിത്തുടങ്ങിയത്​.

നെടുമുടി പഞ്ചായത്തിലും കരുവാറ്റയിലും താറാവ്, കോഴി, കാട മുട്ടയും ഇറച്ചിയും വിൽപന നിരോധിച്ചിരിക്കുകയാണ്​. നെടുമുടിയിലെ മൂന്ന്​ കർഷകരുടെ 21,000 താറാവിൽ ബുധനാഴ്​ച വരെ 12,722 എണ്ണം ചത്തു. ചത്ത താറാവുകളുടെ സാമ്പിൾ ആറുദിവസം മുമ്പ്​ ശേഖരിച്ചെങ്കിലും ഫലം ലഭിച്ചിട്ടില്ല.