ഹൈകോടതി കൈവിട്ടു; ബി.ജെ.പിക്ക്​ തലശ്ശേരിയിലും ഗുരുവായൂരിലും സ്​ഥാനാർഥികളില്ല

കൊച്ചി: തലശ്ശേരി, ഗുരുവായൂർ, ദേവികുളം മണ്ഡലങ്ങളിലെ എൻ.ഡി.എ സ്ഥാനാർഥികളുടെ പത്രിക തള്ളിയതിനെതിരായ ഹരജിയിൽ ഇടപെടാനാവില്ലെന്ന്​ ഹൈകോടതി. ഇതോടെ മൂന്നുമണ്ഡലങ്ങളിലും എൻ.ഡി.എക്ക്​ സ്​ഥാനാർഥികളില്ല.

തെരഞ്ഞെടുപ്പ്​ പ്രക്രിയ തുടങ്ങിയാൽ തെരഞ്ഞെടുപ്പ്​ കമ്മീഷന്‍റെ തീരുമാനമാണ്​ അന്തിമ​മെന്ന്​ ​കോടതി വ്യക്​തമാക്കി. പരാതിയുണ്ടെങ്കിൽ തെരഞ്ഞെടുപ്പിന്​ ശേഷം മാത്രമേ കോടതിയെ സമീപിക്കാനാകൂ.

നാമനിർദേശ പത്രികയിലെ അപാകത ചൂണ്ടിക്കാട്ടിയാണ്​ സ്ഥാനാർഥികളായ മഹിള മോർച്ച സംസ്ഥാന പ്രസിഡന്‍റ്​ നിവേദിത സുബ്രഹ്മണ്യൻ (ഗുരുവായൂർ), ബി​.ജെ.പി കണ്ണൂർ ജില്ല പ്രസിഡന്‍റ്​ എൻ. ഹരിദാസ് (തലശ്ശേരി), ധനലക്ഷ്മി (ദേവികുളം -എ.ഐ.എ.ഡി.എം.കെ) എന്നിവരുടെ പത്രിക തള്ളിയത്​. ഇതിനെതിരെ കഴിഞ്ഞ ദിവസമാണ്​ ഇവർ ഹൈകോടതിയെ സമീപിച്ചത്​.

ചിഹ്നം അനുവദിക്കാൻ സംസ്ഥാന പ്രസിഡന്‍റിനെ ചുമതലപ്പെടുത്തുന്ന ദേശീയ പ്രസിഡൻറ് ഒപ്പിട്ട ഫോം എ സമർപ്പിച്ചിട്ടില്ലെന്ന് ചൂണ്ടിക്കാട്ടി പത്രിക വരണാധികാരി കരുതിക്കൂട്ടി തള്ളുകയായിരുന്നെന്നാണ് എൻ. ഹരിദാസിന്‍റെ ആരോപണം.

ഫോം എയും ബിയും പത്രികക്ക്​ ഒപ്പം നൽകിയിരുന്നു. എന്നാൽ ഫോം എയിൽ ഒപ്പിട്ടില്ല എന്ന അപാകത ശ്രദ്ധയിൽപ്പെട്ടതിനെ തുടർന്ന് തിരുത്തുന്നതിനായി മാർച്ച് 19 ന് അത് മടക്കി നൽകാൻ വരണാധികാരിയോട് ആവശ്യപ്പെട്ടെങ്കിലും അനുവദിച്ചില്ല. പത്രിക സൂക്ഷ്മ പരിശോധന നടത്തുന്ന 20 ന് ദേശീയ പ്രസിഡന്‍റ്​ ഒപ്പിട്ട ഫോം എ പത്രികക്ക്​ ഒപ്പം നൽകിയെങ്കിലും സ്വീകരിച്ചില്ല. ഈ സാഹചര്യത്തിൽ പത്രികക്ക്​ ഒപ്പം നൽകിയ ഫോം എ സാധുതയുള്ളതാണെന്ന് പ്രഖ്യാപിക്കുകയും പത്രിക സ്വീകരിക്കാൻ നിർദേശിക്കുകയും മത്സരിക്കാൻ അനുവദിക്കുകയും ചെയ്യണമെന്നാവശ്യപ്പെട്ടായിരുന്നു ഹൈകോടതിയെ സമീപിച്ചത്​.

നാമനിർദേശ പത്രികക്കൊപ്പം സമർപ്പിക്കുന്ന ഫോം ബിയിൽ സംസ്ഥാന പ്രസിഡൻറിന്‍റെ ഒപ്പില്ല എന്ന കാരണത്താലാണ് തന്‍റെ പത്രിക തള്ളിയതെന്ന് ഗുരുവായൂർ സ്ഥാനാർഥിയായ മഹിള മോർച്ച സംസ്ഥാന പ്രസിഡന്‍റ്​ നിവേദിത സുബ്രഹ്മണ്യന്‍റെ ഹരജിയിൽ പറയുന്നു.

എന്നാൽ എ, ബി ഫോമുകളിൽ ഒപ്പിടാത്തത് പത്രിക തള്ളാൻ കാരണമല്ല. ഈ സാഹചര്യത്തിൽ വരണാധികാരി ഏകപക്ഷീയവും സ്വേഛാപരവും ശരിയല്ലാത്തതുമായ നടപടിയാണ് സ്വീകരിച്ചിട്ടുള്ളത്. അതിനാൽ, വരണാധികാരിയുടെ ഉത്തരവ് റദ്ദാക്കണമെന്നും പത്രിക സ്വീകരിക്കാൻ നിർദേശിക്കണമെന്നുമാവശ്യപ്പെട്ടാണ് ഹരജി നൽകിയത്.