ബി.ജെ.പി സംസ്ഥാന നേതൃയോഗം ആലപ്പുഴയിൽ

ആലപ്പുഴ: കേരളത്തിലെ പാർലമ​െൻറ്​ തെരഞ്ഞെടുപ്പ്​ ഫലം അവലോകനം ചെയ്യാൻ ബി.ജെ.പി നേതൃയോഗം ആലപ്പുഴയിൽ ആരംഭിച്ചു. പുന്നപ്ര പറവൂരിലെ ബൊണാൻസ ഹോട്ടലിൽ രാവിലെ കോർകമ്മിറ്റി യോഗമാണ്​ ആദ്യം ചേർന്നത്​. കേന്ദ്ര പ്രതിനിധിയായി എച്ച്​ രാജ യോഗത്തിൽ പ​ങ്കെുടക്കുന്നുണ്ട്​.

സംസ്ഥാന പ്രസിഡൻറ്​ പി.എസ്​ ശ്രീധരൻപിള്ള, മുതിർന്ന നേതാക്കളായ കുമ്മനം രാജശേഖരൻ, ഒ. രാജഗോപാൽ എം.എൽ.എ, എം.ടി രമേഷ്​, എ.എൻ രാധാകൃഷ്​ണൻ. കെ സുരേന്ദ്രൻ, ശോഭാ സുരേന്ദ്രൻ സംഘടനാ ചുമതലയുള്ള ജനറൽ സെക്രട്ടറി ഗണേഷ്​, എന്നിവർ പങ്കടുക്കുന്നു.

തിരുവനന്തപുരം, തൃശൂർ, പത്തനംതിട്ട, പാലക്കാട്​ ജില്ലകളിലെ പാർട്ടിയുടെ പ്രകടനം മുൻനിർത്തിയുള്ള ചർച്ചകളായിരിക്കും നേതൃയോഗത്തിൽ നടക്കുകയെന്നാണ്​ സൂചന. ആലപ്പുഴയിൽ ഡോ. കെ.എസ്​. രാധാകൃഷ്​ണൻ 1.80 ലക്ഷം വോട്ടുനേടിയത്​ മുൻനിർത്തി അരൂർ നിയമസഭ ഉപതെരഞ്ഞെടുപ്പിന്​ തന്ത്രങ്ങൾ നേതൃയോഗത്തിൽ മെനയാൻ സാധ്യതയുണ്ട്​.

കുമ്മനം രാജശേഖരൻ പരാജയപ്പെടാനിടയായ സാഹചര്യം തന്നെയാണ്​ യോഗത്തിൽ പ്രധാനമായും വിലയിരുത്തുക. മോദി മന്ത്രിസഭയിൽ കേരളത്തിൽനിന്ന്​ ആരൊക്കെ ഉണ്ടാകുമെന്നത്​ സംബന്ധിച്ച ധാരണയും യോഗം കൈക്കൊള്ളുമെന്നാണ്​ സൂചന.