പൊതുരംഗത്ത് നിന്ന് വിട്ടുനിൽക്കും; കുരുതി കൊടുത്തോ എന്ന്​ ജനം തീരുമാനിക്കും -കെ. മുരളീധരൻ

തൃശൂർ: തൃശൂരിലെ ദയനീയമായ തോൽവിയിൽ വികാരഭരിതനായി പ്രതികരിച്ച്​ കോൺഗ്രസ്​ നേതാവ്​ കെ. മുരളീധരൻ. ഇനിയൊരു മത്സരത്തിനില്ല. മത്സരിക്കാനുള്ള മൂഡ് നഷ്ടപ്പെട്ടു. പൊതുരംഗത്തുനിന്ന്​ കുറച്ചുകാലം വിട്ടുനിൽക്കുകയാണ്. തൽക്കാലം ഒന്നിലേക്കും ഇല്ല -അദ്ദേഹം തൃശൂരിൽ മാധ്യമ പ്രവർത്തകരോട്​ പ്രതികരിച്ചു.

കോൺഗ്രസിന്‍റെ ഒരു കമ്മിറ്റിയിലും പങ്കെടുക്കാൻ പോകില്ല. ആരെയും കുറ്റം പറയാനില്ല. തെരഞ്ഞെടുപ്പിൽ തോറ്റെങ്കിലും ഇത്രയും കാലം പാർട്ടിയിൽ നിന്നല്ലേ ആനൂകൂല്യം ലഭിച്ചത്. കോൺഗ്രസുമായി ബന്ധം അവസാനിപ്പിക്കില്ല. എന്നും കോൺഗ്രസുകാരനായി, സാധാരണ പ്രവർത്തകനായി തുടരും. തൽക്കാലം സംഘടനാ-പാർട്ടി പ്രവർത്തനങ്ങളിലേക്കില്ല. ചിലർക്ക്​ ചില സ്ഥലങ്ങളിൽ രാശിയില്ല. ജനിച്ച സ്ഥലത്ത് എനിക്കു രാശിയില്ല -അദ്ദേഹം പറഞ്ഞു.

സുരേഷ്ഗോപിക്ക്​ വേണ്ടി മൂന്ന്​ തവണ പ്രധാനമന്ത്രി വന്നു. സുനിൽകുമാറിന്​ വേണ്ടി പലയിടത്തും പിണറായി വിജയൻ വന്നു. എനിക്കാകെ ഒരു ഡി.കെ. ശിവകുമാർ, അതും രാവിലെ സൂര്യൻ കത്തിനിന്ന നേരത്താണ്​ വന്നത്​. കൂടുതൽ പറഞ്ഞിട്ട്​ കാര്യമില്ല. ദേശീയതല നേതാക്കളടക്കം പ്രചാരണത്തിൽ നിന്നും വിട്ടുനിന്നു. അടുത്ത തവണ തൃശൂരിൽ ചെറുപ്പക്കാർ മത്സരിക്കട്ടെ. കോൺഗ്രസ് സംഘടന സംവിധാനം ആകെ പ്രയാസത്തിലാണ്. അത് മാറ്റിയെടുക്കണമെന്നേ പറയുന്നുള്ളൂ. അത്​ കാരണം തോറ്റുവെന്ന്​ പറഞ്ഞാൽ ശരിയായ കാര്യമില്ല. തൃശൂരിൽ എൽ.ഡി.എഫ് ജയിച്ചിരുന്നെങ്കിൽ തനിക്ക്​ ദുഃഖം ഉണ്ടാകില്ലായിരുന്നു. നേമത്ത്​ കഷ്ടപ്പെട്ടാണ് ബി.ജെ.പി അക്കൗണ്ട് പൂട്ടിച്ചത്. ആ സ്ഥാനത്ത്​ ഞാൻ മത്സരിച്ചിട്ട്​ പോലും ഇവിടെ അക്കൗണ്ട് തുറന്നുവെന്ന പ്രയാസമുണ്ട്.

അടിയൊഴുക്ക് വ്യക്തമാണ്​. ബി.ജെ.പിക്ക് ഒട്ടും പ്രതീക്ഷയില്ലാത്ത, സ്ഥാനാർഥി പോലും മര്യാദക്ക്​ പ്രവൃത്തിക്കാത്ത ഒരിടത്ത് എങ്ങനെ ഇത്രയധികം വോട്ടിന്​ ? ദേശീയ നേതൃത്വത്തോട്​ താനായിട്ട് പരാതി പറയുന്നില്ല. സംസ്ഥാന നേതൃത്വത്തോട്​ തൃശൂരിൽ കോ-ഓർഡിനേഷൻ ഇല്ലെന്ന്​ സൂചിപ്പിച്ചിരുന്നു. ആരെയും കുറ്റം പറഞ്ഞിട്ടില്ല. പക്ഷെ സംസ്ഥാന നേതൃത്വത്തോട്​ പറഞ്ഞതിന്​ വേണ്ടത്ര പരിഗണനയുണ്ടായില്ല. വടകരയിൽ തന്നെ നിന്നാൽ ജയിക്കുമായിരുന്നു. കെ. മുരളീധരൻ എന്ന രാഷ്ട്രീയ നേതാവിനെ കുരുതി കൊടുത്തതാണോ എന്ന്​ ജനം ഭാവിയിൽ തീരുമാനിക്കും. താനതിന് നിന്നു കൊടുക്കേണ്ട കാര്യമുണ്ടായിരുന്നില്ല.

ഉറപ്പായും കിട്ടുമെന്ന്​ വിശ്വസിച്ച ന്യൂനപക്ഷ വോട്ടുകളിലെ വിള്ളലാണ്​ തൃശൂരിൽ ബി.ജെ.പിയുടെ മുന്നേറ്റത്തിന്​ കാരണം. മുന്നാക്ക സമുദായത്തിന്‍റെ ഏതാണ്ട് മുഴുവൻ വോട്ടും ക്രൈസ്തവ വോട്ടും അവർക്ക്​ സമാഹരിക്കാൻ കഴിഞ്ഞു. മുസ്‌ലിം വോട്ടർമാർ ചില നിയോജകമണ്ഡലങ്ങളിൽ എൽ.ഡി.എഫിനൊപ്പം നിന്നു. വോട്ടിലെ ഏകീകരണം യു.ഡി.എഫിന്​ ലഭിച്ചില്ല. സി.പി.എമ്മിന്‍റെ ഉരുക്കുകോട്ടകളായ ചില പഞ്ചായത്തുകളിൽ ബി.ജെ.പി കടന്നുകയറി. സ്വാഭാവികമായും യു.ഡി.എഫിന്​ ലഭിക്കേണ്ട ന്യൂനപക്ഷ വോട്ടുകളിൽ വിള്ളലുണ്ടായപ്പോൾ മൂന്നാം സ്ഥാനത്തേക്ക്​ പോയി. എന്നാൽ ഇടതുപക്ഷത്തിന്​ മികച്ച സ്ഥാനാർഥി ഉണ്ടായിട്ടും വലിയ മുന്നേറ്റം ഉണ്ടാക്കാനായില്ല.

മുമ്പ്​ പറഞ്ഞതുപോലെ സി.പി​.എം-ബി.ജെ.പി അന്തർധാര ഉണ്ടായിട്ടുണ്ടെങ്കിലും അത്​ വലത്തോട്ടും സഞ്ചരിച്ചിട്ടുണ്ട്. രണ്ടു ഭാഗത്തുനിന്നും വോട്ടുപിടിച്ചു. യു.ഡി.എഫിന്‍റെ വോട്ട്​ ചോർന്നത്​ മുഖ്യമായും മുൻ വർഷം കിട്ടിയ രണ്ട്​ പ്രബല സമുദായങ്ങളുടെ വോട്ടിൽ വന്ന വിള്ളലാണ്. ഇത്​ എൽ.ഡി.എഫും യു.ഡി.എഫും ശ്രദ്ധാപൂർവം പരിശോധിക്കുമെന്നാണ്​ പ്രതീക്ഷിക്കുന്നത്.

സംഘടനാപരമായ ദൗർബല്യം പലയിടത്തും പാർട്ടിക്കുണ്ട്. അതിലുപരിയായി ഇങ്ങനെയൊരു സാഹചര്യം കണ്ടുപിടിക്കാനായില്ലെന്നത്​ കോട്ടം തന്നെയാണ്. അതിനെ എങ്ങനെ മറികടക്കാമെന്ന് ആലോചിക്കണം. ബൂത്ത് പ്രവർത്തനത്തിലും വോട്ട്​ ചേർക്കുന്നതിലും വീഴ്ചയുണ്ടായി. മത്സരം എൽ.ഡി.എഫും യു.ഡി.എഫും തമ്മിൽ എന്ന അവസ്ഥ മാറിയത്​ തൃശൂർ പൂരം മുതലാണ്​. പൂരം സർക്കാരിനെതിരായി. അത് ഉപയോഗപ്പെടുത്താൻ യു.ഡി.എഫിന്​ കഴിഞ്ഞില്ല. പൂരം രാഷ്ട്രീയ ലാഭത്തിന്​ ഉപയോഗിക്കണ്ട എന്നതിനാലാണ് അന്ന് പറയാതിരുന്നത്. പൊലീസ്​ കമീഷണറുടെ പ്രവൃത്തി ആരെയോ സഹായിക്കാനാണെന്ന് അന്നേ താൻ പറഞ്ഞു. ഇപ്പോഴത് ഫലവത്തായി. ആ നടപടി ബി.ജെ.പിക്ക്​ വളരെ ഗുണം ചെയ്തു. കമീഷണർ എൽ.ഡി.എഫിന്‍റെ ഒരു ഡീലിന്‍റെ ഭാഗമായാണ് പ്രവൃത്തിച്ചതെന്നും അതിന്‍റെ ഗുണം പോയത് ബി.ജെ.പിക്കാണെന്നും കെ. മുരളീധരൻ പറഞ്ഞു.