മുഖ്യമന്ത്രിക്കെതിരായ കരിങ്കൊടി പ്രതിഷേധം: പൊലീസ് നടപടിക്ക്​ ഇരയായവർക്ക്​ നഷ്ടപരിഹാരം നൽകണമെന്ന ഹരജി തള്ളി

കൊച്ചി: മുഖ്യമന്ത്രിക്കെതിരെ കരിങ്കൊടികാട്ടി പ്രതിഷേധിക്കുന്നതിനിടെ നടന്ന പൊലീസ് നടപടിക്ക്​ ഇരയായവർക്ക്​ നഷ്ടപരിഹാരം നൽകണമെന്നതടക്കം ആവശ്യപ്പെടുന്ന ഹരജി ഹൈകോടതി തള്ളി. പ്രതിഷേധക്കാർക്കെതിരെ സ്വീകരിച്ച നടപടികൾ നിയമവിരുദ്ധമാണെന്ന് പ്രഖ്യാപിക്കണമെന്നുൾപ്പെടെ ചൂണ്ടിക്കാട്ടി പെരുമ്പാവൂർ സ്വദേശി സാം ജോസഫ് നൽകിയ ഹരജിയാണ്​ ചീഫ് ജസ്റ്റിസ് എസ്. മണികുമാർ, ജസ്റ്റിസ് മുരളി പുരുഷോത്തമൻ എന്നിവരടങ്ങുന്ന ഡിവിഷൻ ബെഞ്ച്​ തള്ളിയത്.

കഴിഞ്ഞ വർഷം കൊച്ചി മെട്രോയിലെ പരിപാടിയിൽ മുഖ്യമന്ത്രി പങ്കെടുക്കാനെത്തിയപ്പോൾ കറുത്ത വേഷം ധരിച്ച്​ വേദിക്ക് സമീപത്ത്​ കണ്ടതിനെ തുടർന്ന് ട്രാൻസ്‌ജെൻഡറിനെ കസ്റ്റഡിയിലെടുത്തിരുന്നു. ഈ സംഭവത്തെ തുടർന്നാണ്​ ഹരജി നൽകിയത്.

പൊലീസിനെതിരെ അച്ചടക്ക നടപടി സ്വീകരിക്കണ​മെന്നും മൂന്നു വർഷത്തിനിടെ രജിസ്റ്റർ ചെയ്ത സമാന കേസുകളുടെ വിവരങ്ങൾ ഹാജരാക്കാൻ നിർദേശിക്കണമെന്നുമുള്ള ആവശ്യങ്ങളും ഉന്നയിച്ചിരുന്നു. സർക്കാറിനെയും ഡി.ജി.പിയെയും എതിർ കക്ഷികളാക്കിയാണ്​ ഹരജി നൽകിയിരുന്നത്​.