കോവിഡ് കാലത്ത് ആശാ വർക്കർമാർ നടത്തിയ ഇടപെടലാണ് ഭരണത്തുടർച്ച ഉറപ്പാക്കിയത്; അവരുടെ പ്രശ്നം പരിഹരിക്കാതെ കേന്ദ്രത്തെ പഴിക്കുന്നത്​ അപഹാസ്യം -വി. മുരളീധരൻ

തൃശൂർ: സമരം ചെയ്യുന്ന ആശാ വര്‍ക്കര്‍മാരോടുള്ള നിഷേധാത്മക സമീപനം സംസ്ഥാന സര്‍ക്കാര്‍ അവസാനിപ്പിക്കണമെന്ന് മുൻ കേന്ദ്ര സഹമന്ത്രി വി. മുരളീധരൻ വാർത്തസമ്മേളനത്തിൽ ആവശ്യപ്പെട്ടു. പി.എസ്​.സി അംഗങ്ങള്‍ക്കും കെ.വി. തോമസിനും ലക്ഷങ്ങള്‍ പ്രതിഫലം വർധിപ്പിക്കുന്നത്​ തെരുവില്‍ സമരം ചെയ്യുന്ന പാവപ്പെട്ട സ്ത്രീകളെ അപമാനിക്കലാണ്​. ആശാ വർക്കർമാരുടെ സമരത്തിലും പതിവുപോലെ കേന്ദ്രത്തെ കുറ്റപ്പെടുത്താനാണ് സംസ്ഥാന സർക്കാരിന്‍റെ നീക്കമെന്നും മുരളീധരൻ കുറ്റപ്പെടുത്തി.

കോവിഡ് കാലത്ത് ആശാ വർക്കർമാർ നടത്തിയ ഇടപെടലാണ് ഭരണത്തുടർച്ച ഉറപ്പാക്കിയതെന്ന വസ്തത മുഖ്യമന്ത്രി ഓർക്കണമായിരുന്നു. ദേശീയ ആരോഗ്യ ദൗത്യത്തിന് കീഴില്‍ 2023-‘24ല്‍ 189.15 കോടിയും 2024-‘25ൽ 815.73 കോടിയും കേരളത്തിന് കേന്ദ്രം കൊടുത്തു. ഇനി എത്ര ഫണ്ട് കിട്ടാനുണ്ടെന്ന് ആരോഗ്യ മന്ത്രി

വ്യക്തമാക്കണം. ക്ഷേമ പെന്‍ഷന്‍ കുടിശിക മുതല്‍ ആശാ വർക്കർമാരുടെ ഓണറേറിയം വരെയുള്ള വിഷയങ്ങളില്‍ കേന്ദ്രസര്‍ക്കാരിനെ പഴിക്കുന്നത്​ പരിഹാസ്യമാണ്​.

അധ്വാനിക്കുന്ന തൊഴിലാളി വര്‍ഗത്തിന്‍റേതല്ല, വരേണ്യ വര്‍ഗത്തിന്‍റെ പാര്‍ട്ടിയാ​ണെന്ന്​ തെളിയിക്കുകയാണ് സി.പി.എം. ഏറ്റവും ദുരിതം അനുഭവിക്കുന്നവരെ കൂടുതല്‍ ദുരിതത്തിലേക്ക് തള്ളി വിട്ട് രാഷ്ട്രീയ നിയമനം നേടിയ വന്‍കിടക്കാര്‍ക്കായി ഖജനാവിലെ പണമൊഴുക്കുന്ന സമീപനം പിണറായി വിജയൻ അവസാനിപ്പിക്കണമെന്നും വി. മുരളീധരൻ പറഞ്ഞു.