വീട് കയറി ഗൃഹനാഥനെ വെട്ടിക്കൊലപ്പെടുത്താൻ ശ്രമിച്ച സഹോദരങ്ങൾ പിടിയിൽ

തിരുവല്ല: കവിയൂരിലെ കോട്ടൂരിൽ വീട് കയറി ഗൃഹനാഥനെ വെട്ടിക്കൊലപ്പെടുത്താൻ ശ്രമിച്ച കേസിലെ പ്രതികൾ പിടിയിലായി. സഹോദരന്മാരായ കോട്ടൂർ ആനപ്പാറയ്ക്കൽ വീട്ടിൽ സുനീഷ് (38 ), അനീഷ് ( 34 ) എന്നിവരാണ് തിരുവല്ല പൊലീസിന്‍റെ പിടിയിലായത്. കോട്ടൂർ ആനപ്പാറയ്ക്കൽ വീട്ടിൽ രാജ് മോഹനെ വെട്ടിപ്പരിക്കേൽപ്പിച്ച കേസിലാണ് അറസ്റ്റ്. വ്യാഴാഴ്ച രാവിലെ 11 മണിയോടെ ആയിരുന്നു സംഭവം. വീടു കയറി ആക്രമണം നടത്തിയ പ്രതികൾ രാജ്മോഹനെ വടിവാൾ ഉപയോഗിച്ച് വെട്ടുകയായിരുന്നു.

വീട്ടുമുറ്റത്ത് കിടന്നിരുന്ന ഓട്ടോ റിക്ഷയും സംഘം തല്ലിത്തകർത്തു. സംഭവശേഷം ഒളിവിൽ പോയ പ്രതികളെ വെള്ളിയാഴ്ച ഉച്ചയോടെ തിരുവല്ല സി.ഐ പി.എസ് വിനോദിന്‍റെ നേതൃത്വത്തിൽ എസ്.ഐ അനിൽ, സിവിൽ പൊലീസ് ഓഫീസർമാരായ വിഷ്ണു, നവീൻ സന്തോഷ് എന്നിവരടങ്ങുന്ന സംഘം കണിയാമ്പാറയിൽ നിന്നും അറസ്റ്റ് ചെയ്യുകയായിരുന്നു.

കേസിൽ ഉൾപ്പെട്ട ഒരു പ്രതി കൂടി പിടിയിലാകാനുണ്ട്. പ്രതികളെ കോടതിയിൽ ഹാജരാക്കി റിമാന്‍റ്​ ചെയ്തു.