പൊലീസ്​ വേഷത്തിൽ കാർ തടഞ്ഞ്​ കവർന്നത്​ മുക്കാൽ കോടി; ആസൂത്രകൻ കാറിൽ തന്നെ

തക്കല: തിരുവനന്തപുരം-കന്യാകുമാരി ദേശീയ പാതയില്‍ കാരവിളയില്‍ പൊലീസ്​ വേഷത്തിലെത്തിയവർ കാർ തടഞ്ഞ്​ പണം കവർന്നു. ചൊവ്വാഴ്ച രാവിലെയാണ്​ സംഭവം. 15 മണിക്കൂറിനകം മോഷണം നടത്തിയവരെയും ആസൂത്രകരെയും പിടികൂടിയതായി കന്യാകുമാരി എസ്.പി. ഭദ്രിനാരായണന്‍ വാര്‍ത്താസമ്മേളനത്തില്‍ അറിയിച്ചു.

തിരുവനന്തപുരം സ്വദേശികളായ സുരേഷ്‌കുമാര്‍, കണ്ണന്‍ എന്ന അഖില്‍, രാജേഷ്‌കുമാര്‍, മനു എന്ന സജിന്‍കുമാര്‍, പണവ​ുമായി കാറില്‍ പോയ ജൂവലറി ജീവനക്കാരന്‍ ഗോപകുമാര്‍ എന്നിവരെയാണ് അറസ്‌റ്റ്​ ചെയ്തത്. മോഷണത്തിന് പദ്ധതി തയ്യാറാക്കി മറ്റുള്ളവ​രെ വിളിച്ചു വരുത്തിയത്​ ഗോപകുമാറാണെന്ന് പൊലീസ് പറഞ്ഞു.

നെയ്യാറ്റിന്‍കര കേരള ഫാഷന്‍ ജൂവലറി ഉടമ സമ്പത്തിന്‍റെ കാറില്‍ നാഗര്‍കോവില്‍ ഭാഗത്ത്​ നിന്ന്​ പണവുമായി മടങ്ങുന്ന കാറാണ്​ കവർച്ച ചെയ്​തത്. സ്വര്‍ണ്ണം വിറ്റ്​ സമാഹരിച്ച 76.4 ലക്ഷം രൂപയുമായി മടങ്ങുകയായിരുന്ന കാർ കേരള പൊലീസിന്‍റെ യൂനിഫോം ധരിച്ച സംഘം മറ്റൊരു കാറിലെത്തി തടയുകയായിരുന്നു. ശേഷം പണം കവർന്ന്​ സ്​ഥലം വിട്ടു.

തക്കല പൊലീസിൽ ലഭിച്ച പരാതിയെ തുടർന്നാണ്​ പൊലീസ്​ അന്വേഷണം നടത്തുന്നത്​. കവർന്ന പണവു​ം കേരള പൊലീസ് യൂനിഫോമും കവർച്ചക്കുപയോഗിച്ച വാഹനവും പ്രത്യേക പൊലീസ് സംഘം പിടികൂടിയതായി കന്യാകുമാരി എസ്.പി.ഭദ്രിനാരായണന്‍ പറഞ്ഞു.