വയോധിക വാഹനമിടിച്ച് മരിച്ച സംഭവത്തിൽ ബസ് ഡ്രൈവർ അറസ്റ്റിൽ

പാലക്കാട്: വയോധിക വാഹനമിടിച്ച് മരിച്ച സംഭവത്തിൽ ടൂറിസ്റ്റ് ബസ് ഡ്രൈവറെ അറസ്റ്റ് ചെയ്തു. കോയമ്പത്തൂർ രത്നപുരി പി.ഒ സ്ട്രീറ്റ് സ്വദേശി അഖിലിനെയാണ് (25) പാലക്കാട് ടൗൺ സൗത്ത് പൊലീസ് അറസ്റ്റ് ചെയ്തത്. കണ്ണാടി മണലൂർ സ്വദേശിനി പൊന്നുക്കുട്ടിയാണ് (85) ഞായറാഴ്ച പുലർച്ച വാഹനമിടിച്ച് മരിച്ചത്.

പിറകെ വന്ന വാഹനങ്ങളും ശരീരത്തിലൂടെ കയറിയിറങ്ങിയതിനാൽ മൃതദേഹം തിരിച്ചറിയാൻ ബുദ്ധിമുട്ടായിരുന്നു. പാലക്കാട് ടൗൺ പൊലീസ് കേസെടുത്ത് അന്വേഷിക്കുന്നതിനിടെയാണ് സമീപത്തെ സി.സി.ടി.വി ദൃശ്യങ്ങളടക്കം പരിശോധിച്ച് മണലൂർ ജങ്ഷനിൽ രാത്രി 1.40ഓടെ അപകടം നടക്കുന്നതിന്റെ ദൃശ്യങ്ങൾ കണ്ടെത്തിയത്.