കേബിൾ ടി.വി: ട്രായ്​ നിർദേശങ്ങളിൽ സ്​റ്റേയില്ല

കൊച്ചി: ടെലികോം ​െറഗുലേറ്ററി അതോറിറ്റി ഓഫ് ഇന്ത്യയുടെ (ട്രായ്) നിർദേശപ്രകാരം കേബിള്‍ ടി.വി സര്‍വിസുകളിലും ഡയറക്ട് ടു ഹോം സേവനങ്ങളിലും (ഡി.ടി.എച്ച്) വെള്ളിയാഴ്​ച മുതൽ മാറ്റങ്ങൾ നടപ്പാക്ക​ുന്നത്​ സ്​റ്റേ ചെയ്യണമെന്ന ആവശ്യം ഹൈകോടതി നിരസിച്ചു.

സംബന്ധിച്ച്​ ജനങ്ങൾക്കിടയിൽ ആശയക്കുഴപ്പമുണ്ടെന്നും ​നടപ്പാക്കാൻ കൂടുതൽ സമയം അനുവദിക്കണമെന്നുമാവശ്യപ്പെട്ട്​ കൊല്ലം ഇൻറർനെറ്റ്​ കേബിൾ ഡിസ്​ട്രിബ്യൂഷൻ പ്രൈവറ്റ്​ ലിമിറ്റഡ്​ നൽകിയ ഹരജിയാണ്​ കോടതി പരിഗണിച്ചത്​. ​െഫബ്രുവരി ഒന്നുമുതൽ പണം നൽകി കാണുന്ന ചാനലുകൾക്ക്​ മാത്രമാണ്​ നിയന്ത്രണമുണ്ടാവു​കയെന്നും സൗജന്യമായവ സാധാരണപോലെ ലഭ്യമാകുമെന്നുമുള്ള കേന്ദ്രസർക്കാർ വിശദീകരണം രേഖപ്പെടുത്തിയ ജസ്​റ്റിസ്​ അനു ശിവരാമൻ ഹരജി ഇൗ മാസം എട്ടിലേക്ക്​ മാറ്റി.

സൗജന്യമായി ലഭിക്കുന്ന ചാനലുകൾക്കുപുറമെ പണം നൽകേണ്ടവ വരിക്കാർക്ക്​ തെരഞ്ഞെടുക്കാൻ അവസരം നൽകുന്ന മാറ്റമാണ്​ വെള്ളിയാഴ്​ച മുതൽ നടപ്പാകുന്നത്​. ഇക്കാര്യത്തിൽ ജനങ്ങൾക്കിടയിൽ മതിയായ ബോധവത്​കരണം നടന്നിട്ടില്ലെന്ന്​ ഹരജിയിൽ പറയുന്നു. അതിനാൽ ആശയക്കുഴപ്പം നിലനിൽക്കുകയാണ്​. മാറ്റം നടപ്പാക്കിയാൽ വെള്ളിയാഴ്​ച മുതൽ വരിക്കാർക്ക്​ ചാനലുകൾ ലഭിക്കാത്ത അവസ്ഥയുണ്ടാകും. കേബിൾ ടി.വി ഒാപറേറ്റർമാർക്ക്​ ലൈസൻസ്​ നഷ്​ടമാകാനും ഇടയാകും. അതിനാൽ മാറ്റം നടപ്പാക്കാൻ കൂടുതൽ സമയം അനുവദിക്കണമെന്നായിരുന്നു ഹരജിക്കാരുടെ ആവശ്യം.

ദേശീയതലത്തിൽ സുപ്രീംകോടതിയും ഹൈകോടതികളും ട്രായി നിർദേശപ്രകാരമുള്ള ഇൗ മാറ്റം അംഗീകരിച്ചതാണെന്ന്​ കേന്ദ്രസർക്കാർ കോടതിയെ അറിയിച്ചു. നയപരമായ തീരുമാനമാണിത്​. സൗജന്യമായി അനുവദിക്കുന്ന ചാനലുകളൊന്നും മുടങ്ങില്ല. പണം നൽകുന്നമുറക്ക്​ പെയ്​ഡ്​ ചാനലുകൾ ലഭ്യമാകുമെന്നും കേന്ദ്രസർക്കാർ വ്യക്തമാക്കി. ഇക്കാര്യം രേഖപ്പെടുത്തിയ കോടതി സ്​റ്റേക്ക്​ വിസമ്മതിക്കുകയായിരുന്നു.