ആദ്യം ജയിപ്പിച്ചു, പിന്നെ േതാൽപിച്ചും കാലിക്കറ്റ്​ വാഴ്​സിറ്റിയുടെ ക്രൂരത

തേഞ്ഞിപ്പലം: വിദ്യാർഥികളെ കഠിനമായി പരീക്ഷിച്ച്​ വീണ്ടും കാലിക്കറ്റ്​ സർവകലാശാല. ബാച്ച്​ലർ ഒാഫ്​ ഫിസിക്കൽ എജുക്കേഷൻ (ബി.പി.ഇ) കോഴ്​സ്​ ജയിച്ച്​ എം.പി.ഇ.എഡിന്​ പ്രവേശനം ഉറപ്പായ വിദ്യാർഥികളെയാണ്​ നിങ്ങൾ തോറ്റതാണെന്ന അറിയിച്ചത്​. എം.പി.ഇ.എഡി​​െൻറ പ്രവേശനപരീക്ഷയും കായികക്ഷമത പരീക്ഷയും ​ജയിച്ച്​ റാങ്ക്​ലിസ്​റ്റിൽ ഇടം പിടിച്ച ശേഷമാണ്​ സർവകലാശാലയുടെ ക്രൂരത. ഇരിങ്ങാലക്കുട ക്രൈസ്​റ്റ്​ കോളജിൽനിന്ന്​ ബി.പി.ഇ കോഴ്​സ്​ കഴിഞ്ഞിറങ്ങിയ കള​മശ്ശേരി സ്വദേശി ഷെറിൻ വർഗീസിനും രാമനാട്ടുകര സ്വദേശി മിഥുനുമാണ്​ ഇൗ അവസ്​ഥ. കാലിക്കറ്റ്​ സർവകലാശാല കാമ്പസിലെ എം.പി.ഇ.എഡ്​ കോഴ്​സിനുള്ള റാങ്ക്​ലിസ്​റ്റിൽ ഒന്നാമനാണ്​ ഷെറിൻ വർഗീസ്​. മിഥുൻ 11ാം റാങ്കുകാരനും.

ബി.പി.ഇ റിസൽട്ട്​ വന്നപ്പോൾ ഇരുവരും ജയിച്ചിരുന്നു. ഇതി​​െൻറ അടിസ്​ഥാനത്തിൽ എം.പി.ഇ.എഡിന്​ അപേക്ഷിച്ചു. പ്രവേശന പരീക്ഷയും കായിക ക്ഷമത പരീക്ഷയും ജയിച്ച്​ പ്രവേശനത്തിനായി കാമ്പസിൽ എത്തിയപ്പോഴാണ്​ ‘നിങ്ങൾ ​ബി.പി.ഇ തോറ്റെന്ന്​’ ബന്ധപ്പെട്ട സെക്ഷൻ അറിയിക്കുന്നത്​. രണ്ടു പരീക്ഷകൾക്ക്​ ഇവർക്ക്​ മിനിമം മാർക്കായ 35 ആണ്​ ലഭിച്ചിരുന്നത്​. ഇൗ രണ്ടു പേപ്പറുകൾക്കും രണ്ടാം തവണയാണ്​ ഇവർ എഴുതുന്നത്​. ആദ്യ ചാൻസിൽ ജയിക്കാൻ 35ഉം രണ്ടാം ചാൻസിൽ 40ഉം മാർക്കെന്നാണ്​ നിബന്ധന. രണ്ടാം ചാൻസെന്ന കാര്യം പരീക്ഷാഭവൻ ജീവനക്കാർ അറിയാതെ അബദ്ധത്തിൽ ജയിച്ചുവെന്ന്​ കാണിക്കുകയായിരുന്നു. ഇതേപോലെ 11 കുട്ടികളെയും പിന്നീട്​ തോൽപിച്ചതായി വിദ്യാർഥികൾ പറഞ്ഞു. 

സർവകലാശാല നടപടിക്കെതിരെ വിദ്യാർഥികൾ കോടതിയെ സമീപിച്ചിട്ടുണ്ട്​. അതേസമയം, ഇൗ രണ്ടു പേർക്ക്​ 32 മാർക്കാണ്​ ലഭിച്ചതെന്നും മൂന്നു മാർക്ക്​ മോഡറേഷൻ നൽകിയാണ്​ 35 തന്നെ ആയതെന്ന്​ പരീക്ഷാഭവൻ അധികൃതർ പറഞ്ഞു. ആദ്യ ചാൻസിൽ പരീക്ഷയെഴുതിയതെന്ന നിലക്കാണ്​ മോഡറേഷൻ നൽകിയതെന്നും രണ്ടാം ചാൻസെന്ന വിവരം ബന്ധപ്പെട്ട സെക്ഷൻ അറിയാതെ പോയത്​ അബദ്ധമാണെന്നും അധികൃതർ വിശദീകരിച്ചു.