വയലാർ കൊലപാതകം: കൂടുതൽ പേർക്കെതിരെ കേസ്​; അറസ്​റ്റിലായവർ റിമാൻഡിൽ

ചേര്‍ത്തല: വയലാറിൽ ആര്‍.എസ്.എസ് പ്രവർത്തകൻ നന്ദു വെട്ടേറ്റ്​ മരിച്ച കേസില്‍ കൂടുതൽ പേരെ പ്രതികളാക്കി പൊലീസ്​ കേസെടുത്തു. അറസ്​റ്റിലായ എട്ടുപേരുള്‍പ്പെടെ സംഭവത്തിലുള്‍പെട്ട 16 പേരെ തിരിച്ചറിഞ്ഞിട്ടുണ്ട്. പുറമെ, കണ്ടാലറിയാവുന്ന ഒമ്പതുപേര്‍ക്കെതിരെയും കേസുണ്ട്​.. അറസ്​റ്റിലായ എട്ടുപേരെ മജിസ്‌ട്രേറ്റിന്​ മുന്നില്‍ ഹാജരാക്കി റിമാന്‍ഡ്​ ചെയ്തു. മറ്റുപ്രതികള്‍ക്കായി തിരച്ചില്‍ ഊര്‍ജിതമാക്കി. ആർ.എസ്​.എസ്​-എസ്​.ഡി.പി.ഐ സംഘർഷമുണ്ടായ സ്ഥലത്തുനിന്ന്​ മൂന്ന്​ വടിവാള്‍ കണ്ടെത്തി.

കേസ്​ അന്വേഷിക്കാൻ അഡീഷനൽ എസ്.പി എ. നസീറി​െൻറ മേല്‍നോട്ടത്തില്‍ ചേര്‍ത്തല ഡിവൈ.എസ്.പി വിനോദ് പിള്ളയുടെ നേതൃത്വത്തിൽ 10 അംഗ പ്രത്യേക അന്വേഷണസംഘത്തിന്​ രൂപംനല്‍കി. ദക്ഷിണമേഖല ഐ.ജി ഹര്‍ഷിത അട്ടല്ലൂരിയും ജില്ല പൊലീസ് മേധാവി ജെ. ജയദേവും അന്വേഷണ പുരോഗതി വിലയിരുത്തും.

കഴിഞ്ഞ 24ന് രാത്രി എസ്.ഡി.പി.ഐ-ആര്‍.എസ്.എസ് സംഘര്‍ഷത്തിനിടെ നാഗംകുളങ്ങര സ്വദേശി നന്ദു കൃഷ്ണയാണ്​ വെട്ടേറ്റുമരിച്ചത്. മറ്റൊരു ആര്‍.എസ്.എസ് പ്രവര്‍ത്തകൻ കെ.എസ്. നന്ദുവിന്​ വെട്ടേൽക്കുകയും ചെയ്​തു. കൊലപാതകത്തെത്തുടര്‍ന്ന് ചേര്‍ത്തലയിലും വയലാറിലും ചേര്‍ത്തല തെക്കിലുമായി നടന്ന എട്ട് ആക്രമണങ്ങളിൽ വേറെയും കേസെടുത്തിട്ടുണ്ട്. വയലാറും ചേര്‍ത്തലയും പൂര്‍ണമായും പൊലീസ് നിരീക്ഷണത്തിലാണ്.

ബി.ജെ.പി നേതാവ് കുമ്മനം രാജശേഖരന്‍ നന്ദു കൃഷ്ണയുടെ വീട്​ സന്ദര്‍ശിച്ചു. ശനിയാഴ്ച രാവിലെ കേന്ദ്രമന്ത്രിമാരായ പ്രഹ്ലാദ് ജോഷിയും വി. മുരളീധരനും എത്തുന്നുണ്ട്​.