എം.എൽ.എയുടെ വ്യാജ ഒപ്പിട്ട് നിയമസഭയിൽനിന്ന്​ പണം തട്ടി; മുൻ പി.എക്കെതിരെ കേസ്​

തിരുവനന്തപുരം: നാട്ടിക എം.എൽ.എ സി.സി. മുകുന്ദന്‍റെ വ്യാജ ഒപ്പിട്ട് രേഖ ചമച്ച് നിയമസഭയിൽനിന്ന്​ ഓവർടൈം ഡ്യൂട്ടി അലവൻസ് തട്ടിയെടുത്ത സംഭവത്തിൽ എം.എൽ.എയുടെ മുൻ പി.എ മസൂദ് കെ. വിനോദിനെതിരെ മ്യൂസിയം പൊലീസ് കേസെടുത്തു.

നിയമസഭയിൽ നിന്നും ലഭ്യമാക്കിയ വിവരാവകാശരേഖ പ്രകാരം യൂത്ത് കോൺഗ്രസ് സംസ്ഥാന നേതാവ് എ.എ. മുഹമ്മദ് ഹാഷിം നൽകിയ പരാതിയിലാണ് പൊലീസ്​ നടപടി. വ്യാജരേഖ ചമക്കൽ, വഞ്ചനകുറ്റം തുടങ്ങിയ ഗുരുതര വകുപ്പുകളാണ് പ്രതിക്കെതിരെ ചുമത്തിയിട്ടുള്ളത്.

2021 ജൂൺ ഒന്നുമുതൽ 2023 ഡിസംബർ 31 വരെയുള്ള കാലയളവിൽ എം.എൽ.എയുടെ പേഴ്സൽ സ്റ്റാഫായി സേവനം അനുഷ്​ഠിച്ചിരുന്ന മസൂദ്, നിയമസഭ സമ്മേളന സമയത്ത്​ സഭയിൽ എത്താതെ പങ്കെടുത്തെന്ന വ്യാജേന എം.എൽ.എയുടെ വ്യാജ ഒപ്പിട്ട് ഓവർടൈം ഡ്യൂട്ടി അലവൻസായി 85,400 രൂപ കൈപ്പറ്റിയതായാണ്​ പൊലീസ് കണ്ടെത്തിയിട്ടുള്ളത്​.

എം.എൽ.എ ഓഫിസിലെ പ്രവർത്തനങ്ങളിലും ക്രമക്കേടുകൾ കണ്ടെത്തിയതോടെ 2024 ജനുവരിയോടെ മസൂദിനെ പേഴ്സനൽ സ്റ്റാഫിൽനിന്ന്​ എം.എൽ.എ പുറത്താക്കിയിരുന്നു. ഇതുസംബന്ധിച്ച്​ പാർട്ടിക്ക് മുമ്പാകെ എം.എൽ.എ പരാതി നൽകിയിട്ടും ജില്ല നേതൃത്വം മസൂദിനെ സംരക്ഷിച്ചെന്ന അക്ഷേപവും പ്രവർത്തകർക്കിടയിലുണ്ട്. ചാഴൂർ സ്വദേശിയായ മസൂദ്, വി.എസ്. സുനിൽകുമാർ മന്ത്രിയും എം.എൽ.എയും ആയിരുന്നപ്പോഴും പേഴ്സനൽ അസിസ്റ്റന്‍റായിരുന്നു.