സി.ബി.എസ്.ഇ സ്കൂളുകൾക്ക് അവധിക്കാല ക്ലാസിന് അനുമതി
text_fieldsകൊച്ചി: അവധിക്കാല ക്ലാസ് നടത്താൻ ഹരജി നൽകിയ സി.ബി.എസ്.ഇ സ്കൂളുകൾക്ക് ഹൈകോടതി അനുമതി. ബാലാവകാശ കമീഷൻ നിർദേശത്തെത്തുടർന്ന് പൊതു വിദ്യാഭ്യാസ ഡയറക്ടറും സി.ബി.എസ്.ഇ അധികൃതരും അവധിക്കാല ക്ലാസ് തടഞ്ഞിരുന്നു. ഇതിനെതിരെ ഗ്ലോബൽ പബ്ലിക് സ്കൂൾ ഉൾപ്പെടെ 52 സ്കൂളുകൾ നൽകിയ ഹരജിയിലാണ് ക്ലാസ് നടത്താൻ ഹരജിക്കാർക്ക് അനുമതി നൽകിയത്.
അവധിക്കാല ക്ലാസ് തടഞ്ഞു ബാലാവകാശ കമീഷൻ ഫെബ്രുവരി 24 ന് നൽകിയ ഉത്തരവും ഇതനുസരിച്ച് ഡി.പി.ഐ മാർച്ച് 31ന് ഇറക്കിയ സർക്കുലറും സിംഗിൾബെഞ്ച് സ്റ്റേ ചെയ്തിരുന്നു. ഹരജി നൽകിയ സ്കൂൾ മാനേജ്മെൻറുകൾക്ക് ക്ലാസ് നടത്താൻ കഴിയുന്ന തരത്തിൽ സ്റ്റേ നിലനിൽക്കുമെന്നും സിംഗിൾബെഞ്ച് വ്യക്തമാക്കി. ഹരജിക്കാർ ഒരാഴ്ചക്കുള്ളിൽ ക്ലാസ് നടത്താൻ തീരുമാനിച്ച തീയതി വ്യക്തമാക്കി അനുമതി അപേക്ഷ സി.ബി.എസ്.ഇ റീജനൽ ഒാഫിസിൽ നൽകണം. അവധിക്കാല ക്ലാസ് നടത്താൻ മതിയായ സൗകര്യമുണ്ടെന്ന് പ്രിൻസിപ്പലും സ്കൂൾ മാനേജ്മെൻറ് അധികാരിയും രേഖാമൂലം ഉറപ്പ് നൽകണം.
സ്കൂൾ പി.ടി.എ യോഗം അവധിക്കാല ക്ലാസിന് അനുമതി നൽകി പാസാക്കിയ പ്രമേയവും സമർപ്പിക്കണം. സി.ബി.എസ്.ഇ റീജനൽ ഡയറക്ടർ ഈ രേഖകളും കഴിഞ്ഞ അധ്യയന വർഷം ഹർത്താലും സമരവും നിമിത്തം നഷ്ടമായ ക്ലാസുകളുടെ എണ്ണവുമൊക്കെ പരിശോധിച്ച് അവധിക്കാല ക്ലാസിന് അനുമതി നൽകണം. പരമാവധി 20 ദിവസം വരെ ക്ലാസ് നടത്താൻ അനുവദിക്കാം. അപേക്ഷ ലഭിച്ച് പത്ത് ദിവസത്തിനുള്ളിൽ റീജനൽ ഡയറക്ടർ തീരുമാനമെടുക്കണമെന്നും നിർദേശിച്ചിട്ടുണ്ട്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.