എണ്ണ വില കൂട്ടാത്ത സംസ്ഥാന സർക്കാർ എന്തിനാണ് കുറക്കുന്നത്​? -കാനം

മാരാരിക്കുളം: കഴിഞ്ഞ ആറു വർഷമായി പെട്രോളിയം ഉൽപന്നങ്ങൾക്ക്​ ഒരു രൂപ പോലും വർധിപ്പിക്കാതിരുന്ന സംസ്ഥാന സർക്കാർ എന്തിനാണ് വില കുറക്കുന്നതെന്ന്​​ സി.പി.ഐ സംസ്ഥാന സെക്രട്ടറി കാനം രാജേന്ദ്രൻ. സി.പി.ഐ കലവൂർ ലോക്കൽ കമ്മറ്റി ഓഫീസ് ഉദ്ഘാടനം ചെയ്യുകയായിരുന്നു കാനം.

രാജ്യത്ത് പെട്രോളിയം ഉൽപന്നങ്ങളുടെ വില അനിയന്ത്രിതമായി വർധിപ്പിച്ച് രസിച്ചിരുന്നവരാണ്​ കുറവ് വരുത്താൻ തയ്യാറാകേണ്ടത്​. വില കൂട്ടാൻ നയങ്ങൾ സ്വീകരിക്കുന്ന ബി.ജെ.പി യെ സംരക്ഷിക്കാൻ കോൺഗ്രസ് രംഗപ്രവേശം ചെയ്യുന്നത് സ്വയം പരിഹാസ്യമാകാനെ ഉപകരിക്കൂ -കാനം പറഞ്ഞു.

ജി.കൃഷ്ണ പ്രസാദ് അധ്യക്ഷത വഹിച്ചു. ടി.ജെ. ആഞ്ചലോസ്, പി.വി. സത്യനേശൻ, പി.കെ.മേ ദിനി, പി. ജ്യോതിസ്, വി.പി. ചിദംബരൻ, ആർ.സുരേഷ്, ദീപ്തി അജയകുമാർ, സനൂപ് കുഞ്ഞുമോൻ എന്നിവർ സംസാരിച്ചു.