കേന്ദ്ര സർവകലാശാല മുൻ പി.വി.സിയെ സ്ഥലംമാറ്റിയ നടപടിക്ക്​ സ്​റ്റേ

കാസർകോട്: കേന്ദ്ര സർവകലാശാല മുൻ ​​പ്രോ വൈസ് ചാൻസലറെ സ്ഥലം മാറ്റിയ നടപടി ഹൈക്കോടതി സ്​റ്റേ ചെയ്​തു. മുൻ പി.വി.സിയും ഇൻറർനാഷനൽ റിലേഷൻസ് ആൻഡ്​ പൊളിറ്റിക്​സിലെ പ്രഫസറുമായ ഡോ. കെ. ജയപ്രസാദിനെ കേന്ദ്ര സർവകലാശാല തിരുവനന്തപുരം കാപിറ്റൽ സെൻററിലേക്ക് മാറ്റിയ നടപടിയാണ് കോടതി താൽക്കാലികമായി തടഞ്ഞത്.

സീനിയർ പ്രഫസറായ ജയപ്രസാദിനെ പ്രസ്​തുത പദവി ഇല്ലാത്ത കാപിറ്റൽ സെൻററിലേക്ക് മാറ്റിയത് ചട്ടവിരുദ്ധമാണെന്ന് ഇദ്ദേഹത്തിനായി ഹാജരായ എൽവിൻ പീറ്റർ വാദിച്ചു. അതേസമയം സർവകലാശാല അഭിഭാഷക​െൻറ ഭാഗത്തുനിന്നും വി.സിയുടെ സ്ഥലംമാറ്റ ഉത്തരവിനെ സാധൂകരിക്കുന്ന വാദങ്ങൾ ഉണ്ടായില്ലെന്ന് ആരോപണം ഉയർന്നിട്ടുണ്ട്.

വി.സി സ്ഥാനത്തുനിന്ന്​ മാറ്റിയ ശേഷവും, സർവകലാശാലയുടെ ഭരണപരമായ കാര്യങ്ങളിൽ അനാശാസ്യ ഇടപെടലുകൾ നടത്തുന്നുവെന്നതിനെ തുടർന്നാണ് സ്ഥലംമാറ്റ ഉത്തരവ് പുതിയ വി.സി നടത്തിയതെന്ന് പറയപ്പെടുന്നു. ഇതിനെതിരെ ജയപ്രസാദ് മുൻകൈ എടുത്ത് രൂപവത്കരിച്ചതായി പറയുന്ന അധ്യപക സംഘടന രംഗത്തുവന്നിരുന്നു.