സേട്ടോ സേട്ടാ... ഈ ‘ചങ്ങാതി’ എവിടെ കിട്ടും?

കോട്ടയം: ‘ഭായി’മാരെ മലയാളം പഠിപ്പിക്കുന്ന ‘ചങ്ങാതി’ ഡിജിറ്റലാകുന്നു. അന്തർസംസ്ഥാന തൊഴിലാളികൾക്കായി സംസ്ഥാന സാക്ഷരത മിഷൻ നടത്തുന്ന ‘ചങ്ങാതി’ പദ്ധതിയുടെ ഭാഗമായുള്ള ‘ഹമാരി മലയാളം’ പാഠാവലിയാണ്​ ഡിജിറ്റലാക്കി മാറ്റുന്നത്​. പഠിതാക്കളുടെ ആവശ്യംകൂടി പരിഗണിച്ചാണ്​ മൊ​ബൈലിൽ അടക്കം ലഭ്യമാക്കാൻ കഴിയുംവിധം പാഠഭാഗങ്ങൾ ഡിജിറ്റൽ മാതൃകയിലാക്കുന്നത്​. മേയ്​ മാസത്തോടെ പുതിയ രീതിയിൽ പുസ്തകം ലഭ്യമാക്കാനാണ്​ സാക്ഷരത മിഷന്‍റെ തീരുമാനം.

ഇതിനൊപ്പം സിലബസും ഉടച്ചുവാർക്കും​. ശുചിത്വത്തിന്​ മുൻതൂക്കം നൽകിയാകും പാഠഭാഗങ്ങൾ. നിലവിലെ പാഠാവലിയിൽ ഭാഷ, സംസ്‌കാരം, ആരോഗ്യം, ശുചിത്വം എന്നിവ ഉൾപ്പെടുത്തിയിട്ടുണ്ടെങ്കിലും പ്രാഥമികതലത്തിൽ മാത്രമാണ്​ വിഷയത്തെ പരിചയപ്പെടുത്തുന്നത്​. പരിഷ്​കരിക്കുന്ന പതിപ്പിൽ ശുചിത്വശീലങ്ങൾ, ഇവ പാലിക്കേണ്ടതിന്‍റെ ആവശ്യകത, വിവിധ മാതൃകകൾ എന്നിവയുണ്ടാകും. സാമ്പത്തിക സാക്ഷരത, കാലാവസ്ഥ, സർക്കാറുമായി ബന്ധപ്പെട്ട വിവിധ സേവനങ്ങൾ എന്നിവയും പുതുതായി ഉൾപ്പെടുത്തും. നിക്ഷേപം വളർത്താനുള്ള മാർഗങ്ങളും വിശദീകരിക്കും.

സംസ്ഥാനത്ത്​ ഇതുവരെ 7,700 തൊഴിലാളികളാണ് ചങ്ങാതി കോഴ്​സ്​ പൂർത്തിയാക്കിയത്​. നാലുമാസംകൊണ്ട് തൊഴിലാളികളെ മലയാളത്തിൽ സാക്ഷരരാക്കാൻ ലക്ഷ്യമിട്ടാണ്​ സാക്ഷരതമിഷൻ ‘ചങ്ങാതി’ പദ്ധതി 2018ൽ ആരംഭിച്ചത്​. ആഴ്ചയിൽ അഞ്ചുമണിക്കൂറാണ് ക്ലാസ്. കേരളത്തിൽ സ്ഥിരതാമസമാക്കുന്നവരുടെ എണ്ണം ഉയരുന്ന സാഹചര്യത്തിൽ കൂടുതൽ പേർ ‘ചങ്ങാതി’യു​ടെ ഭാഗമാകാൻ താൽപര്യം കാട്ടുന്നുണ്ടെന്ന്​ സാക്ഷരതമിഷൻ അധികൃതർ പറയുന്നു.