കെ.എസ്​.ഇ.ബിയിൽ മാറ്റം; ജില്ലകളുടെ ചുമതല ഡയറക്ടർമാർക്ക്​

തൃശൂർ: കാര്യക്ഷമത മെച്ചപ്പെടുത്തി സാമ്പത്തിക അച്ചടക്കം ഉൾപ്പെടെ കടുപ്പിക്കുന്നതിന്‍റെ ഭാഗമായി ജില്ലകളുടെ ചുമതല ഡയറക്ടർമാർക്ക്​ നൽകാൻ കെ.എസ്​.ഇ.ബി മാനേജിങ്​ ഡയറക്ടറുടെ ഉത്തരവ്​. വിവിധ സർക്കിളുകളടങ്ങുന്ന ജില്ലയിലെ അച്ചടക്ക നടപടിയും പരിശോധനയും ഉൾ​പ്പെടെ പരിപൂർണ ചുമതല ബന്ധപ്പെട്ട ഡയറക്ടർക്കായിരിക്കും. ഇത്​ സംബന്ധിച്ച നിർദേശം ചെയർമാൻ ഡോ. ബി. അശോക്​ ഫുൾടൈം ഡയറക്ടർ ബോർഡിന്​​ കൈമാറി. ഡോ. ബി. അശോകിന്​ വയനാട്​, കോഴിക്കോട്​ ജില്ലകൾ ഉൾപ്പെടുന്ന സർക്കിളുകളുടെ ചുമതലയും ഫിനാൻസ്​ ഡയറക്ടർ വി.ആർ. ഹരിക്ക്​ മലപ്പുറം ജില്ലയുടെയും ചുമതല നൽകി.

കൊല്ലം, എറണാകുളം, പത്തനംതിട്ട ജില്ലകളുടെ ചുമതല വിതരണ വിഭാഗം ഡയറക്ടർ സി. സുരേഷ്​ കുമാറിനും തിരുവനന്തപുരം, പാലക്കാട്​ ജില്ലകളുടേത്​ ആർ. സുകുവിനും കാസർകോട്​​, ഇടുക്കി ചുമതല എസ്​.ആർ. ആനന്ദിനും​ തൃശൂർ​, കോട്ടയം, കണ്ണൂർ ജില്ലകളുടേത്​ സിജി ജോസിനും​ ആലപ്പുഴ ചുമതല ജി. രാധാകൃഷ്ണനുമാണ്​ നൽകിയിട്ടുള്ളത്​.

ഊർജ വിതരണവുമായി ബന്ധപ്പെട്ട കാര്യങ്ങളിൽ വിവിധ ജില്ല ഭരണകൂടവുമായി ബന്ധം സ്ഥാപിക്കുക, അച്ചടക്ക കാര്യങ്ങൾ പരിശോധിക്കുക, സ്​ത്രീകൾക്ക്​ പ്രാഥമിക സൗകര്യങ്ങളുണ്ടെന്ന്​ ഉറപ്പുവരുത്തുക തുടങ്ങിയവ സംബന്ധിച്ച്​ നാല് മാസത്തിലൊരിക്കൽ റിപ്പോർട്ട്​ ഡയറക്ടർബോർഡിൽ സമർപ്പിക്കേണ്ടതുണ്ട്​.

സർക്കിളുകളിൽ രണ്ട്​ മാസത്തിലൊരിക്കൽ പരിശോധന നടത്തുകയും വിവിധ പരിപാടികളിൽ പങ്കാളികളാകുകയും വേണം. മികച്ച സേവനം കാഴ്ചവെക്കുന്ന ഓഫിസുകൾക്ക്​ ​ ​െഡപ്യൂട്ടി ചീഫ്​ എൻജിനീയർമാർ, ചീഫ്​ എൻജിനീയർമാർ എന്നിവരിൽ നിന്ന്​ ലഭിക്കുന്ന ശിപാർശയുടെ അടിസ്ഥാനത്തിൽ അംഗീകാരം നൽകും. മോശം അവസ്ഥയിലുള്ള സർക്കിളുകളുടെ പിന്നാക്കാവസ്ഥ പരിഹരിക്കാനുള്ള രൂപരേഖ തയ്യാറാക്കാനും നിർദേശിച്ചിട്ടുണ്ട്​. പ്രതിമാസം മൂന്നോ നാലോ ദിവസം ഫീൾഡ്​ ഇൻസ്​പെക്​ഷന് വേണ്ടി ഡയറക്ടർ ചെലവിടണം.