യു.ഡി.എഫ്​ വിപ്​ ലംഘിച്ച ജോസ്​ വിഭാഗം എം.എൽ.എമാരുടെ നടപടി​ വഞ്ചന​ -ചെന്നിത്തല

തിര​ുവനന്തപുരം: ഭരണപക്ഷത്തിനെതിരെയുള്ള അവിശ്വാസ പ്രമേയത്തിന്​ യു.ഡി.എഫ്​ വിപ്​ ലംഘിച്ച്​ സഭയിലെത്താതിരുന്ന കേരള കോൺഗ്രസ്​ ജോസ്​ വിഭാഗം എം.എൽ.എമാരുടെ നടപടി വഞ്ചനാപരമെന്ന്​ പ്രതിപക്ഷ നേതാവ്​ രമേശ്​ ചെന്നിത്തല. ഇവർക്കെതിരെ യു.ഡി.എഫ്​ നടപടിയെട​ുക്കുമെന്നും അദ്ദേഹം കുട്ടിച്ചേർത്തു.

യു.ഡി.എഫിൻെറ വോട്ട്​ വാങ്ങി ജയിച്ച രണ്ട്​ എം.എൽ.എമാർ അഴിമതി സർക്കാറിനെതിരെ വോട്ട്​ രേഖപ്പെടുത്താൻ നിയമസഭയിൽ വന്നില്ല. അവർ വോട്ട്​ വാങ്ങിയതും ജയിച്ചതു​ം​ യു.ഡി.എഫിൻെറ പേരിലാണ്​. അവർ രണ്ട്​ പേരും ജനാധിപത്യ വിശ്വാസികളും ഇൗശ്വര വിശ്വാസികളുമായ കേരള ജനതയോട്​ ചെയ്​തത്​ ഏറ്റവും വലിയ വഞ്ചനയാണ്​.

ഭാവി തീരുമാനങ്ങൾ യു.ഡി.എഫ്​ യോഗം ചേർന്ന്​ തീരീമാനിക്കുമെന്നും അദ്ദേഹം പറഞ്ഞു. സ്​പീക്കർ പ്രതിപക്ഷത്തോട്​ അനീതി കാണിച്ചു. മുഖ്യമന്ത്രിക്കും മന്രതിമാർക്കും കൂടി 90 മിനുട്ട്​​ ആണ്​ സമയം നൽകിയത്​. എന്നാൽ ഇവർ നാല്​ മണിക്കൂർ സമയമാണ്​ എടുത്തത്​. സ്​പീക്കർ പക്ഷപാതിത്വം കാണിച്ചുവെന്നും പ്രതിപക്ഷ നേതാവ്​ പറഞ്ഞു.

മുഖ്യമന്ത്രിയുടെ ഉച്ചഭാഷിണിയായി സ്​പീക്കർ അധഃപതിക്കുന്നതാണ്​ സഭയിൽ കണ്ടതെന്ന്​ പ്രതിപക്ഷ ഉപനേതാവ്​ എം.കെ. മുനീർ ആരോപിച്ചു. പ്രതിപക്ഷത്തിൻെറ പ്രസംഗത്തിൽ ഇടപെട്ടുകൊണ്ടിരുന്ന സ്​പീക്കർ മൂന്നര മണിക്കൂർ ഓർമ നഷ്​ടപ്പെട്ട ആളെ പോലെയാണ്​ കസേരയിൽ ഇരുന്നതെന്നും അദ്ദേഹം പറഞ്ഞു. ഇത്രയും ഏകപക്ഷീയമായി പെരുമാറുന്ന ഒര​ു സ്​പീക്കറെ കേരളം മുമ്പ്​ കണ്ടിട്ടില്ലെന്നും മുനീർ കൂട്ടിച്ചേർത്തു.