ചേവായൂർ സഹകരണ ബാങ്ക്​: ഭരണസമിതിക്ക്​ നയപര തീരുമാനമെടുക്കുന്നതിൽ വിലക്കില്ല

കൊച്ചി: ചേവായൂര്‍ സഹകരണ ബാങ്ക് ഭരണസമിതിയെ നയപരമായ തീരുമാനമെടുക്കുന്നതിൽനിന്ന്​ വിലക്കണമെന്ന ആവശ്യം അനുവദിക്കാതെ ഹൈകോടതി.

വ്യാപക ക്രമക്കേട് അരങ്ങേറിയതിനാൽ തെരഞ്ഞെടുപ്പ്​ റദ്ദാക്കണമെന്നതടക്കം ആവശ്യമുന്നയിച്ച്​ നൽകിയ ഹരജിയിലെ ഇടക്കാല ആവശ്യമാണ്​ ജസ്റ്റിസ്​ എൻ. നഗരേഷ്​ തള്ളിയത്​. തെരഞ്ഞെടുപ്പ്​ റദ്ദാക്കണമെന്ന ഹരജി തീർപ്പാകുംവരെ നയപരമായ തീരുമാനമെടുക്കുന്നത് തടയണമെന്നായിരുന്നു 11 കോൺ​ഗ്രസ്​ സ്ഥാനാർഥികളുടെയും ഇടക്കാല ആവശ്യം. അതേസമയം, ഹരജിയിൽ സംസ്ഥാന സഹകരണ തെരഞ്ഞെടുപ്പ് കമീഷനടക്കം എതിർകക്ഷികളോട്​ വിശദീകരണം തേടി.

സഹകരണ ബാങ്ക് തെരഞ്ഞെടുപ്പില്‍ വ്യാപക ക്രമക്കേട് നടത്തിയെന്നും ഇതിന്‍റെ ഭാഗമായി ഭയാനകാന്തരീക്ഷം സൃഷ്​ടിച്ചെന്നുമായിരുന്നു ഹരജിയിലെ ആരോപണം.

തെരഞ്ഞെടുപ്പ്​ ദിവസം വോട്ടര്‍മാര്‍ ആക്രമിക്കപ്പെട്ടു. കോണ്‍ഗ്രസ് പാനലിലുള്ള സ്ഥാനാർഥികള്‍ക്ക് പൊലീസ് സംരക്ഷണം നല്‍കിയില്ലെന്നും ഹരജിയിൽ ആരോപിച്ചു. എന്നാൽ, സർക്കാറിനെ ഹരജിയിൽ കക്ഷി ചേർക്കാതിരുന്നത്​ എന്തെന്ന്​ കോടതി ​ആരാഞ്ഞു. തുടർന്ന്​​ എതിർകക്ഷികൾക്ക്​ നോട്ടീസ്​ ഉത്തരവായ കോടതി ഹരജി പിന്നീട്​ പരിഗണിക്കാൻ മാറ്റി.