ക്രിസ്​മസ്-പുതുവത്സര ആഘോഷം: ദീപാലങ്കാരങ്ങളുടെ സുരക്ഷ ഉറപ്പാക്കണമെന്ന്

തിരുവനന്തപുര: ക്രിസ്​മസ്-പുതുവത്സര ആഘോഷങ്ങളോടനുബന്ധിച്ച് വീടുകളിലും മറ്റും വൈദ്യുത നക്ഷത്ര വിളക്കുകളും ദീപാലങ്കാരങ്ങളും ചെയ്യുമ്പോൾ സുരക്ഷ നടപടികൾ കൈക്കൊള്ളുകയും ജാഗ്രത പാലിക്കുകയും വേണമെന്ന് ചീഫ് ഇലക്​ട്രിക്കൽ ഇൻസ്പെക്ടർ നിർദേശിച്ചു.

നക്ഷത്ര വിളക്കുകളും ദീപാലങ്കാരങ്ങളും താൽക്കാലിക വയറിങ്​ നിയമപ്രകാരം ലൈസൻസുള്ള വ്യക്തികളെക്കൊണ്ടു മാത്രം ചെയ്യിക്കണം. എർത്ത് ലീക്കേജ് സർക്യൂട്ട് ബ്രേക്കർ സ്ഥാപിച്ചെന്നും അത് പ്രവർത്തനക്ഷമമാണെന്നും ഉറപ്പാക്കണം. ഇൻസുലേഷൻ നഷ്ടപ്പെട്ടതോ ദ്രവിച്ചതോ കൂട്ടിയോജിപ്പിച്ചതോ ആയതും നിലവാരം കുറഞ്ഞതുമായ വയറുകൾ ദീപാലങ്കാരങ്ങൾക്ക് ഉപയോഗിക്കരുത്.

ഐ.എസ്.ഐ ഗുണനിലവാരമുള്ള വയറുകളും അനുബന്ധ ഉപകരണങ്ങളും മാ​ത്രം തെരഞ്ഞെടുക്കണം. കണക്ടറുകൾ ഉപയോഗിച്ചുമാത്രമേ വയറുകൾ കൂട്ടിയോജിപ്പിക്കാവൂ. ഗ്രില്ലുകൾ​, ഇരുമ്പുകൊണ്ടുള്ള വസ്തുക്കൾ, ലോഹനിർമിത ഷീറ്റുകൾ എന്നിവയിലൂടെ ദീപാലങ്കാരങ്ങൾ വലിക്കുന്നത്​ ഒഴിവാക്കണം. വീടുകളിലെ എർത്തിങ്​ സംവിധാനം കാര്യക്ഷമമാണെന്ന് ഉറപ്പാക്കണമെന്നും അറിയിപ്പിൽ പറയുന്നു.