‘മാപ്പ്... മനസ്സ്​ നഷ്​ടപ്പെടുമെന്നായപ്പോൾ പോയതാണ്’

കൊച്ചി: ‘മാപ്പ്... വിഷമിപ്പിച്ചതിന്. മനസ്സ്​ നഷ്​ടപ്പെടുമെന്ന് തോന്നിയപ്പോൾ ശാന്തി തേടി ഒരു യാത്ര പോയതാണ്. ഇപ് പോൾ തിരികെ യാത്ര...’ കാണാതായ എറണാകുളം സെൻട്രൽ സി.ഐ വി.എസ്. നവാസ് ശനിയാഴ്ച രാവിലെ 10.30ഓടെ ഫേസ്ബുക്കിൽ കുറിച്ചതാണിത്​ .

കണ്ടെത്തിയെന്ന ആശ്വാസ വാർത്ത കുടുംബത്തിലും സുഹൃത്തുക്കളിലേക്കും എത്തിയ ശേഷമായിരുന്നു അദ്ദേഹം ഫേസ്ബുക്കിൽ വന്നത്. സുഹൃത്തുക്കൾക്കുമാത്രം കാണാൻ സാധിക്കുന്ന രീതിയിലായിരുന്നു ഫേസ്ബുക്ക് പോസ്​റ്റ്​. എല്ലാവരെയും വിഷമിപ്പിച്ചതിന് മാപ്പ് ചോദിക്കുന്നതോടൊപ്പം യഥാർഥ പ്രശ്നത്തിലേക്കുകൂടി വിരൽചൂണ്ടുന്ന തരത്തിലാണ് പോസ്​റ്റ്​. സുഹൃത്തുക്കളും ബന്ധുക്കളുമടങ്ങുന്ന നൂറിലധികം ആളുകളാണ് ഇതിൽ കമൻറ് ചെയ്തിരിക്കുന്നത്. രാമനാഥപുരം വരെ പോയതായിരു​െന്നന്ന് മാത്രമാണ് മാധ്യമങ്ങളോട് അദ്ദേഹം ഫോണിലൂടെ പ്രതികരിച്ചത്.

മേലുദ്യോഗസ്ഥരുടെ കടുത്ത മാനസിക പീഡനം മൂലമാണ് നവാസ് നാടുവിടാൻ കാരണമെന്ന് ഭാര്യ ആരിഫ നൽകിയ പരാതിയിൽ പറഞ്ഞിരുന്നു. എ.സി.പി പി.എസ്. സുരേഷുമായി വയർലെസിലൂടെ വാഗ്വാദമുണ്ടായശേഷമാണ് നാടുവിട്ടതെന്നും വ്യക്തമായിരുന്നു.