നെടുങ്കണ്ടത്ത്​ ബാറിൽ വാക്കേറ്റവും കത്തിക്കുത്തും; യുവാവിന് കഴുത്തിലും വയറ്റിലുമാണ് കുത്തേറ്റത്, ഒരാൾ കസ്റ്റഡിയിൽ

നെടുങ്കണ്ടം: ടൗണിലെ ബാറില്‍ യുവാവിനെ കുത്തിക്കൊലപ്പെടുത്താന്‍ ശ്രമം. കല്‍ക്കുന്തല്‍ നടുവത്താനി റോബിന്‍സിനാണ്​ (39) കുത്തേറ്റത്. സംഭവത്തിൽ കോട്ടയം സ്വദേശിയായ ഉണ്ണികൃഷ്ണനെ പൊലീസ് കസ്റ്റഡിയിലെടുത്തു. റോബിൻസിനെ കട്ടപ്പനയിലെ സ്വകാര്യ ആശുപത്രിയിൽ പ്രവേശിപ്പിച്ചു. കഴുത്തില്‍ രണ്ട് കുത്തും വയറില്‍ ഒരു കുത്തുമേറ്റു.

നെടുങ്കണ്ടം പടിഞ്ഞാറേക്കവലയില്‍ പ്രവര്‍ത്തിക്കുന്ന ബാറില്‍ ഞായറാഴ്ച വൈകീട്ട് ആറോടെയാണ് സംഭവം. രാവിലെ മുതല്‍ ഇരുവരും ബാറിലെത്തി മദ്യപിച്ചിരുന്നു. വൈകുന്നേരത്തോടെ ചെറിയ തോതില്‍ വാക്കേറ്റമുണ്ടാകുകയും ഉണ്ണികൃഷ്ണന്‍ കൈയില്‍ കരുതിയിരുന്ന കത്തി ഉപയോഗിച്ച് റോബിന്‍സിനെ കുത്തുകയുമായിരുന്നെന്ന് പൊലീസ് പറഞ്ഞു.

ബാര്‍ അധികൃതര്‍ അറിയിച്ചതനുസരിച്ച് പൊലീസ് എത്തിയപ്പോള്‍ ഉണ്ണികൃഷ്ണന്‍ ഓടിക്കളയാന്‍ ശ്രമിച്ചു. പിന്തുടര്‍ന്നെത്തിയ പൊലീസ് സെന്‍ട്രല്‍ ജങ്​ഷനില്‍വെച്ച് പിടികൂടുകയായിരുന്നു. പൊന്നാങ്കാണി എസ്‌റ്റേറ്റിലെ തൊഴിലാളിയാണ് ഉണ്ണികൃഷ്ണന്‍.