കോളജുകൾ രാവിലെ എട്ടു മുതൽ രാത്രി എട്ടു​വരെ; സമയമാറ്റം മുന്നോട്ടുവെച്ച്​ മന്ത്രി

തിരുവനന്തപുരം: സംസ്ഥാനത്തെ കോളജുകളുടെ സമയം രാവിലെ എട്ടു​ മുതൽ രാത്രി എട്ടു വരെയാക്കിയും അധ്യാപകർ ഷിഫ്​റ്റ്​ അടിസ്ഥാനത്തിൽ പ്രവർത്തിക്കാനുമുള്ള നിർദേശം മുന്നോട്ടുവെച്ച്​ ഉന്നത വിദ്യാഭ്യാസ മന്ത്രി ഡോ.ആർ. ബിന്ദു. ഉന്നത വിദ്യാഭ്യാസ പാഠ്യപദ്ധതി ചട്ടക്കൂട്​ രൂപവത്​കരണത്തിന്‍റെ ഭാഗമായി സംഘടിപ്പിച്ച ശിൽപശാല ഉദ്​ഘാടനം ചെയ്യുകയായിരുന്നു മന്ത്രി.

ഉന്നത വിദ്യാഭ്യാസ മേഖലയിലെ പരിഷ്​കാരങ്ങൾക്കു​വേണ്ടി കോളജ്​ പ്രവർത്തന സമയത്തിൽ മാറ്റംവരുത്തേണ്ടതുണ്ടെന്ന്​ മന്ത്രി പറഞ്ഞു. രാവിലെ എട്ടു​ മുതൽ രാത്രി എട്ടു​ വരെയാക്കി ഷിഫ്​റ്റ്​ സമ്പ്രദായം കൊണ്ടുവന്നാൽ അധ്യാപകർക്ക്​ സ്വന്തം ഗവേഷണത്തിനും സമയം കണ്ടെത്താനാകും. ശനിയാഴ്ച കൂടി പ്രവൃത്തി ദിവസമാക്കുന്നതും ആലോചിക്കാം.

പുതിയ കരിക്കുലവും സിലബസും വരുമ്പോൾ അധ്യാപകരുടെ ജോലി ഭാരത്തെ ബാധിക്കുമോ എന്ന ആശങ്ക വേണ്ട. നിലവിലുള്ള അധ്യാപകരെ ഉൾക്കൊണ്ടുതന്നെ കോഴ്​സ്​ കോമ്പിനേഷൻ രൂപപ്പെടുത്താനാകും. വിദേശരാജ്യങ്ങളിൽ ഉൾപ്പെടെ ഉപരിപഠനത്തിന്​ പോകാൻ നാലുവർഷ ബിരുദ കോഴ്​സ്​ വേണമെന്നതിനാൽ കൂടിയാണ്​ അതിനുള്ള അവസരം ഒരുക്കുന്നത്​. ഇന്‍റഗ്രേറ്റഡ്​ പിഎച്ച്​.ഡി കോഴ്​സുകൾ തെരഞ്ഞെടുത്ത സ്ഥാപനങ്ങളിൽ നൽകാൻ കഴിയണമെന്നും മന്ത്രി പറഞ്ഞു.

കേരളത്തിൽനിന്ന്​ വിദ്യാർഥികൾ കൂട്ടത്തോടെ പലായനം ചെയ്യുന്നെന്നതിൽ ഒരുപരിധിവരെ വസ്തുതയുണ്ട്​. അധ്യാപകരുടെ ഏകാധിപത്യത്തിൽനിന്ന്​ ക്ലാസ്​ മുറികളെ മോചിപ്പിക്കണം. വിദ്യാർഥികൾക്ക്​ സർഗാത്മക പ്രകടനത്തിനുള്ള വേദി കൂടിയാകണം ക്ലാസ്​ മുറികൾ.

കോഴ്​സ്​ കഴിഞ്ഞിറങ്ങുന്നവർ ചാവി കൊടുത്താൽ ഓടുന്ന പാവകളോ ബ്രോയിലർ കോഴിക്കുഞ്ഞുങ്ങളോ ആയല്ല പുറത്തിറങ്ങേണ്ടത്​. കോഴ്​സുകളുടെ തെരഞ്ഞെടുപ്പിൽ കുട്ടികൾക്ക്​ പരമാവധി സ്വാതന്ത്ര്യം അനുവദിക്കണം. കോഴ്​സ്​ ഇടക്കുവെച്ച്​ മുറിഞ്ഞുപോകുന്ന കുട്ടിക്ക്​ തിരികെ വരാൻ കഴിയുന്ന സാ​ഹചര്യം ഉണ്ടാക്കണമെന്നും മന്ത്രി അഭിപ്രായപ്പെട്ടു. ഉന്നത വിദ്യാഭ്യാസ കൗൺസിൽ മെംബർ സെക്രട്ടറി ഡോ. രാജൻ വർഗീസ്​ അധ്യക്ഷതവഹിച്ചു.