പരാതിക്കാരന്​ പൊലീസ്​ സ്​റ്റേഷനിൽ മർദനം: എ.ഡി.ജി.പിയോട്​ ഹൈകോടതി റിപ്പോർട്ട് തേടി

കൊച്ചി: പരാതി നൽകാനെത്തിയ പട്ടികജാതിക്കാരനെ മർദിക്കുകയും വിലങ്ങണിയിച്ച് സ്​റ്റേഷനിൽ തടഞ്ഞുവെക്കുകയും ചെയ്തെന്ന പരാതിയിൽ ഇതുവരെ സ്വീകരിച്ച നടപടി അറിയിക്കണമെന്ന്​ ഹൈകോടതി. കൊല്ലം തെന്മല പൊലീസ് സ്​റ്റേഷനിൽ ഉറുകുന്ന് സ്വദേശി രാജീവിന് മർദനമേറ്റ സംഭവത്തിലാണ്​ ജസ്​റ്റിസ്​ ദേവൻ രാമചന്ദ്രൻ എ.ഡി.ജി.പിയോട്​ റിപ്പോർട്ട് തേടിയത്​. തുടർന്ന്​ ഹരജി നവംബർ 26ന്​ വീണ്ടും പരിഗണിക്കാൻ മാറ്റി.

ഒരുബന്ധു ഫോണിൽ വിളിച്ച് അസഭ്യം പറഞ്ഞത്​ സംബന്ധിച്ച​ പരാതി നൽകാൻ ഫെബ്രുവരി മൂന്നിന് സ്​റ്റേഷനിലെത്തിയപ്പോഴാണ് രാജീവിന് മർദനമേറ്റത്. രസീത് ചോദിച്ചപ്പോൾ സി.ഐ വിശ്വംഭരൻ വിലങ്ങിട്ട്​ പൂട്ടി മർദിച്ചെന്നാണ് ആരോപണം. പിന്നീട് വിട്ടയച്ചെങ്കിലും പൊലീസ് ഉദ്യോഗസ്ഥ​െൻറ ഡ്യൂട്ടി തടസ്സപ്പെടുത്തിയെന്ന കുറ്റം ചുമത്തി തൊട്ടടുത്ത ദിവസം എസ്.ഐ ശാലുവി​െൻറ നേതൃത്വത്തി​െല സംഘം അറസ്​റ്റ് ചെയ്തു.

സംഭവത്തെത്തുടർന്ന് ഡി.ജി.പിക്ക്​ നൽകിയ പരാതിയിൽ ഡിവൈ.എസ്.പി അന്വേഷണം നടത്തി സി.ഐക്കും എസ്.ഐക്കുമെതിരെ റിപ്പോർട്ട് നൽകിയെങ്കിലും നടപടിയുണ്ടായില്ലെന്ന്​ ഹരജിയിൽ പറഞ്ഞിട്ടുണ്ട്​. തുടർന്ന് ഹൈകോടതിയുടെ ഉത്തരവനുസരിച്ച് ഡി.ജി.പിക്ക്​ വേണ്ടി എ.ഡി.ജി.പി വിജയ് സാഖറെ നൽകിയ റിപ്പോർട്ടിൽ സി.ഐ വിശ്വംഭരനെ സസ്പെൻഡ് ചെയ്തെന്നും എസ്.ഐ ശാലുവിനെ താക്കീത് ചെയ്തെന്നും അറിയിച്ചു.

ഹരജിക്കാരൻ നേരിട്ട ഭയാനക സാഹചര്യം വെളിവാക്കുന്നതാണ് പരാതിയെന്നും വൈകാതെ അന്വേഷണം പൂർത്തിയാക്കേണ്ടതുണ്ടെന്നും കോടതി അഭിപ്രായപ്പെട്ടു. തുടർന്നാണ്​ ഇതുവരെ സ്വീകരിച്ച നടപടി അറിയിക്കാൻ കോടതി നിർദേശിച്ചത്​.