താരങ്ങളെ കാണാൻ കോവിഡ് പ്രോട്ടോകോൾ ലംഘിച്ച് ജനക്കൂട്ടമെത്തി; 'അമ്മ' ഓഫിസ് ഉദ്ഘാടന ചടങ്ങിനെതിരെ പരാതി

കൊച്ചി: താരങ്ങളെ ഒരുനോക്കുകാണാൻ കലൂർ ദേശാഭിമാനി റോഡിൽ തടിച്ചുകൂടിയത് നൂറുകണക്കിന്​ ആളുകൾ. കോവിഡ് പ്രോട്ടോകോൾ ലംഘിച്ച് ജനം തടിച്ചുകൂടിയത് 'അമ്മ' ആസ്ഥാന മന്ദിരത്തി​െൻറ ഉദ്ഘാടനത്തിന്​ എത്തിയ മമ്മൂട്ടിയും മോഹൻലാലുമുൾ​െപ്പടെ നിരവധി താരങ്ങളെ കാണാനാണ്. ഇതോടെ രാവിലെ മുതൽ ഗതാഗതക്കുരുക്കും അനുഭവപ്പെട്ടു.

രാവിലെ 10നായിരുന്നു ഉദ്ഘാടന ചടങ്ങ്. ദൂരദേശങ്ങളിൽനിന്നുൾ​െപ്പടെ ധാരാളം ആളുകൾ 'അമ്മ' ഓഫിസിെൻറ മുന്നിലെ റോഡിൽ നിലയുറപ്പിച്ചു. മതിലിനുമുകളിലും കെട്ടിടങ്ങളുടെ ബാൽക്കണിയിലുമെല്ലാം നിറഞ്ഞുനിൽക്കുന്ന കാഴ്ചയായിരുന്നു. സമൂഹ അകലം കാറ്റിൽപറത്തിയാണ് തടിച്ചുകൂടിയത്.

എറണാകുളം നോർത്ത്, സെൻട്രൽ സ്​റ്റേഷനുകളിൽനിന്നും ട്രാഫിക് വിഭാഗത്തിൽനിന്നുമായി 40 പൊലീസുകാരെ നിയന്ത്രണത്തിന്​ നിയോഗിച്ചെങ്കിലും പലപ്പോഴും ഫലപ്രദമായില്ല. സംഘാടകർ ഏർപ്പെടുത്തിയ പ്രത്യേക സെക്യൂരിറ്റി സംഘവും ഉണ്ടായിരുന്നു. പൊലീസി​െൻറ സാന്നിധ്യത്തിൽപോലും ചിലർ മാസ്ക് കൃത്യമായി ധരിക്കാത്ത കാഴ്ചയുമുണ്ടായിരുന്നു. ഉദ്ഘാടനവും വാർത്തസമ്മേളനവും കഴിഞ്ഞ് നടീനടന്മാർ ഇറങ്ങുംവരെ മണിക്കൂറുകളോളമാണ് ആൾക്കൂട്ടം കാത്തുനിന്നത്.

ഉദ്ഘാടന ചടങ്ങിനെതിരെ പരാതി

കൊച്ചി: 'അമ്മ' ഓഫിസ് ഉദ്ഘാടന ചടങ്ങിൽ കോവിഡ് മാനദണ്ഡങ്ങൾ ലംഘിച്ചെന്ന്​ ചൂണ്ടിക്കാട്ടി കൊച്ചി ഡി.സി.പിക്കും കലക്ടർക്കും പരാതി. യൂത്ത് കോൺഗ്രസ് സംസ്ഥാന സെക്രട്ടറി പി.വൈ. ഷാജഹാനാണ് പരാതി നൽകിയത്. ഓഫിസ് ഉദ്ഘാടനത്തിന് നൂറ്റമ്പതിലേറെ അഭിനേതാക്കൾ ഉൾ​െപ്പടെയുള്ളവർ ഒത്തുകൂടുകയും പരിസരത്ത് അഞ്ഞൂറിലേറെ പൊതുജനം സമൂഹ അകലം പാലിക്കാതെ കൂട്ടംകൂടുകയും ചെയ്തെന്നും സമൂഹവ്യാപന സാഹചര്യം സൃഷ്​ടിച്ചെന്നുമാണ് പരാതി. സംഘടന ഭാരവാഹികൾക്കെതിരെ പകർച്ചവ്യാധി തടയൽ നിയമം വകുപ്പ് മൂന്ന് പ്രകാരവും ഐ.പി.സി 268, 269, 270 വകുപ്പുകൾ പ്രകാരവും കേസെടുക്കണമെന്നാണ് ആവശ്യം.