മലപ്പുറം ജില്ലക്കെതിരായ വിദ്വേഷപ്രചാരണത്തിൽ വ്യാപക പ്രതിഷേധം; മനേക ഗാന്ധിക്കെതിരെ പരാതി നൽകി

മലപ്പുറം: പാലക്കാട്​ ജില്ലയിൽ ആന കൊല്ലപ്പെട്ട സംഭവത്തിൽ മലപ്പുറത്തിനെതിരെ നടക്കുന്ന വിദ്വേഷ പ്രചാരണത്തിൽ വ്യാപക പ്രതിഷേധം. മുൻ കേന്ദ്ര മന്ത്രിയും ബി.ജെ.പി നേതാവുമായ മനേക ഗാന്ധി അടക്കമുള്ളവർ പ്രചാരണം ഏറ്റുപിടിച്ചതോടെ വിഷയം ദേശീയ തലത്തിലും ചർച്ചയായി. സംഘ്​പരിവാർ കേ​ന്ദ്രങ്ങൾ ഇവരുടെ വാക്കുകൾ ഉദ്ധരിച്ച്​ മലപ്പുറ​ത്തിനെതിരായ പ്രചാരണങ്ങൾക്ക്​ മൂർച്ചകൂട്ടി. സീന്യൂസ്​​ പോലുള്ള ദേശീയ മാധ്യമങ്ങളും ഇവരുടെ പ്രചാരണം ഏറ്റെടുത്തു. 

‘‘മലപ്പുറം ഇത്തരം സംഭവങ്ങൾക്ക്​ കുപ്രസിദ്ധമാണ്​. പ്രത്യേകിച്ച്​ മൃഗങ്ങൾക്കെതിരായ അതിക്രമങ്ങളിൽ. നേരത്തെ ഇവിടെ വിഷം കൊടുത്ത് നിരവധി​ പക്ഷികളെയും നായകളെയും കൊന്നിരുന്നു. നാനൂറോളം ജീവികളെയാണ്​ ഇത്തരത്തിൽ കൊന്നൊടുക്കിയത്​. സംഭവത്തിൽ സർക്കാർ ഇതുവരെ കേസെടുക്കാൻ തയാറായിട്ടില്ല. ഇത്തരക്കാർക്കെതിരെ നടപടിയെടുക്കാൻ സർക്കാറിന്​ ഭയമാണ്​. 

സംസ്​ഥാനത്ത്​ ദിനംപ്രതി മൂന്ന്​ ആനകൾ കൊല്ലപ്പെടുന്നുണ്ട്​. ഏകദേശം അറുനൂറോളം ആനകൾ സംസ്​ഥാനത്ത്​ വിവിധ കാരണങ്ങളാൽ കൊല്ലപ്പെട്ടത്​​. രാഹുൽ ഗാന്ധിയുടെ മണ്ഡലത്തിന്​ സമീപമാണ്​ ആന ചരിഞ്ഞ സംഭവം. എന്തു​കൊണ്ട്​ അദ്ദേഹം വിഷയത്തിൽ ഇടപെട്ടി​ല്ല’’ -ഇതായിരുന്നു മനേക ഗാന്ധിയുടെ പ്രസ്​താവന. 

മലപ്പുറത്തിനെതിരായ കുപ്രചാരണത്തിനെതിരെ നടിമാരായ റിമ കല്ലിങ്കൽ, പാർവതി തിരുവോത്ത്​, യുവനടൻ നീരജ്​ മാധവ്​ തുങ്ങിയവരും രംഗത്തെത്തിയിരുന്നു. ‘മൃഗങ്ങൾക്കെതിരെയുള്ള ആക്രമണങ്ങൾ അവസാനിപ്പിക്കേണ്ടതാണ്. ഇതുമായി ബന്ധപ്പെട്ട് നടക്കുന്ന ഒരു ജില്ലയെ മാത്രം ലക്ഷ്യം വെച്ചുകൊണ്ടുള്ള അപവാദ പ്രചരണലജ്ജ തോന്നുന്നു’ എന്നായിരുന്നു പാർവതി ട്വിറ്ററിൽ കുറിച്ചത്​. 

‘ആന പ്രശ്നം വർഗീയവത്കരിക്കാൻ ശ്രമിക്കുന്നവർ വണ്ടി വിട്ടോ. ഇത് കേരളമാണ്. സ്വന്തം തെറ്റുചൂണ്ടിക്കാട്ടാൻ ഞങ്ങൾക്കു മടിയില്ല. പക്ഷെ, അതിനെ വെളിയിൽനിന്ന് ചിലർ മുതലെടുക്കാൻ നോക്കിയാൽ ഞങ്ങൾ നോക്കിനിക്കില്ല’ -നീരജ്​ ഫേസ്​ബുക്കിൽ കുറിച്ചു. 

മനേക ഗാന്ധിയുടെ പ്രസ്​താവനക്കെതിരെ സോളിഡാരിറ്റി മലപ്പുറം ജില്ല കമ്മിറ്റി എസ്​.പി, ഡി.ജി.പി, ആഭ്യന്തര മന്ത്രി എന്നിവർക്ക്​ പരാതി. മനേക ഗാന്ധിയുടെ മലപ്പുറം വിരുദ്ധ പ്രസ്താവനക്കെതിരെ മുസ്​ലിം യൂത്ത് ലീഗ് ചാണകം ഒഴിക്കൽ സമരവും നടത്തും. വ്യാഴാഴ്​ച വൈകീട്ട് നാലിന്​ മലപ്പുറം പ്രസ്ക്ലബ്​ പരിസരത്തുനിന്ന് പ്രതിഷേധ പ്രകടനം ആരംഭിക്കുമെന്ന്​ യൂത്ത് ലീഗ് മലപ്പുറം മണ്ഡലം കമ്മിറ്റി അറിയിച്ചു. 

മേയ്​ 27ന്​​ പാലക്കാട്​ ജില്ലയിലെ  സൈലൻറ്​ വാലി ദേശീയോദ്യാനത്തിലായിരുന്നു ഗർഭിണിയായ ആന ​െചരിഞ്ഞത്​. സംഭവത്തിൽ വനംവകുപ്പും പൊലീസും​ കേസ്​ രജിസ്​റ്റർ ചെയ്​തിട്ടുണ്ട്​. വന്യജീവി സംരക്ഷണ നിയമപ്രകാരമാണ്​ ​കേസെടുത്തതെന്ന്​ മണ്ണാർക്കാട്​ ഫോറസ്​റ്റ്​ റേഞ്ച്​ ഓഫിസർ പറഞ്ഞു. 

സ്ഫോടകവസ്തു നിറച്ച കൈതച്ചക്കയാണ്​ ആന കടിച്ചത്​. കൃഷിയിടത്തിൽ കയറുന്ന പന്നികളെ കൊല്ലാൻ ഉപയോഗിക്കുന്ന പടക്കമാണ്​ ഇ​തെന്ന നിഗമനത്തിലാണ്​ അധികൃതർ. മേയ് 25ന് രാവിലെയാണ് തിരുവിഴാംകുന്ന് അമ്പലപ്പാറ വെള്ളിയാര്‍പ്പുഴയില്‍ കാട്ടാനയെ അവശനിലയില്‍ കണ്ടെത്തിയത്. 

വനപാലകര്‍ കണ്ടെത്തുമ്പോൾ വേദന സഹിക്കാനാവാതെ വനമേഖലയിലെ പുഴയില്‍ മുഖം പൂഴ്ത്തി നില്‍ക്കുകയായിരുന്നു. പോസ്റ്റ്മോര്‍ട്ടത്തിലൂടെയാണ് കാട്ടാന ഗര്‍ഭിണി ആയിരുന്നുവെന്ന് മനസ്സിലായത്. ശ്വാസകോശത്തില്‍ വെള്ളം കയറിയാണ് മരണം സംഭവിച്ചതെന്ന്​ ഡോക്​ടര്‍മാര്‍ പറഞ്ഞു.