കോൺഗ്രസ്​ ഒരു സമുദായ സംഘടനയുമായും സ്​പർധക്ക്​ പോകാറില്ല; സുധാകരൻ തുടരേണ്ടെന്ന്​ ആരും പറഞ്ഞിട്ടില്ലെന്ന് കെ. മുരളീധരൻ

തിരുവനന്തപുരം: കെ.പി.സി.സി.സി ​പ്രസിഡന്‍റ്​ സ്ഥാനത്ത്​ കെ. സുധാകരൻ തുടരേണ്ടെന്ന്​ ആരും പറഞ്ഞിട്ടില്ലെന്ന്​ കോൺഗ്രസ്​ നേതാവ് കെ. മുരളീധരൻ. അതുകൊണ്ട്​ അതിന്‍റെ കാര്യത്തിൽ പിന്തുണ ഉറപ്പാക്കേണ്ട കാര്യമില്ലെന്നും അദ്ദേഹം പറഞ്ഞു.

കോണ്‍ഗ്രസിലെ പുനഃസംഘടന ചര്‍ച്ചകള്‍ക്കിടെ, കെ.പി.സി.സി അധ്യക്ഷന്‍ താനുമായി കൂടിക്കാഴ്ച നടത്തിയെന്ന വാർത്തകളോട്​ പ്രതികരിക്കുകയായിരുന്നു മുരളീധരൻ. ഞാനുമായി രണ്ട്​ കാര്യങ്ങളേ സംസാരിച്ചിട്ടുള്ളൂ. കെ. കരുണാകരൻ ഫൗണ്ടേഷൻ, ജയ്​ഹിന്ദ്​ ചാനൽ എന്നിവയുമായി ബന്ധപ്പെട്ടാണ്​ സംസാരിച്ചത്​. തൃശൂരിലെ സംഘടനാ വിഷയങ്ങളും അദ്ദേഹത്തിന്റെ ശ്രദ്ധയിൽപെടുത്തി.

സാമുദായിക സംഘടനകൾക്ക്​ അവരുടെ പരിപാടിക്ക്​ ​ഇഷ്ടമുള്ളവരെ ക്ഷണിക്കാം. ചെന്നിത്തലയെ ക്ഷണിച്ചതിൽ അത്ഭുതമില്ല. കോൺഗ്രസ്​ ഒരു സമുദായ സംഘടനയുമായും സ്​പർധക്ക്​ പോകാറില്ല. അവർ വിമർ​ശിക്കു​​മ്പോഴും ഞങ്ങൾ തിരിച്ച്​ ഒന്നും പറയാറില്ല. എൻ.എസ്​.എസിന്‍റെ പരിപാടിക്ക്​ ഓരോ വർഷം ഓരോ ആളെയാണ്​ മുഖ്യാതിഥിയായി ക്ഷണിക്കുക. താനും എൻ.എസ്​.എസ്​ പരിപാടിയിൽ പ​ങ്കെടുത്തിട്ടുണ്ടെന്നും കെ. മുരളീധരൻ പറഞ്ഞു.