കോൺഗ്രസ്​ നേതാക്കളുടെ തുറന്ന പോരിന് ഹൈകമാൻഡിന്‍റെ വിലക്ക്

ന്യൂഡൽഹി: ​തദ്ദേശ തെര​ഞ്ഞെടുപ്പിനു പിന്നാലെ പാർട്ടി നേതാക്കൾ നടത്തുന്ന തുറന്ന പോര്​ വിലക്കി കോൺഗ്രസ്​ ഹൈകമാൻഡിന്‍റെ​ ഇടപെടൽ. സംസ്ഥാന നേതൃത്വത്തെ ചില നേതാക്കൾ പരസ്യമായി വിമർശിക്കുന്നത്​ ഉടനടി അവസാനിപ്പിക്കണമെന്ന്​ നേതൃത്വം നിർദേശിച്ചു.

എതിർപ്പുകൾ പരസ്യമായി പ്രകടിപ്പിക്കരുത്​. അവ പാർട്ടി വേദിയിൽ പറയണം. നേതൃത്വത്തി​െൻറ ശ്രദ്ധയിൽ പെടുത്തുന്ന പരാതികൾ പരിശോധിച്ച്​ പരിഹരിക്കും. പരസ്​പരം തുറന്ന ആക്ഷേപം നടത്തുന്നത്​ പാർട്ടിയെ ശക്തിപ്പെടുത്തുകയല്ല, എതിരാളികൾക്ക്​ ശക്തി കൊടുക്കുകയാണ്​ ചെയ്യുന്നതെന്ന്​ തിരിച്ചറിയണമെന്ന്​ കേരളത്തിന്‍റെ ചുമതലയുള്ള എ.ഐ.സി.സി ജനറൽ​ സെക്രട്ടറി പ്രസ്​താവനയിൽ ഓർമിപ്പിച്ചു.

സോണിയ ഗാന്ധിയുടെ അധ്യക്ഷതയിൽ ശനിയാഴ്​ച ഡൽഹിയിൽ നേതൃയോഗം ചേർന്നതിനൊപ്പമാണ്​ കേരള നേതാക്കൾക്കായി പ്രത്യേക നിർദേശം ഉണ്ടായത്​. തദ്ദേശ തെരഞ്ഞെടുപ്പിലെ തോൽവി യോഗത്തിൽ ചർച്ചയായി. ഇതിനിടെ കേരള ചുമതലയുള്ള എ​.ഐ.സി.സി ജനറൽ സെക്രട്ടറിയെ പാർട്ടി പ്രവർത്തനത്തിൽ സഹായിക്കുന്നതിന്​ മൂന്നു പേരെ എ.ഐ.സി.സി സെക്രട്ടറിമാരായി നിയോഗിച്ചു. മുൻ എം.പി പി. വിശ്വനാഥൻ, ഇവാൻ ഡിസൂസ, പി.വി. മോഹൻ എന്നിവരെയാണ്​ നിയമിച്ചത്​.