കോൺഗ്രസ്​ നേതാക്കളുടെ പാണക്കാട്​ സന്ദർശനം: വിജയരാഘവ​​​േന്‍റത്​​​ തെറ്റായ പ്രതികരണമല്ല -മുഖ്യമന്ത്രി

തിരുവനന്തപുരം: കോൺഗ്രസ്​ നേതാക്കൾ മുസ്​ലിംലീഗ്​ നേതാക്കളെ സന്ദർശിച്ചതിനെക്കുറിച്ച്​ തെറ്റായ പ്രതികരണമല്ല എൽ.ഡി.ഫ്​ കൺവീനർ എ. വിജയരാഘവൻ നടത്തിയതെന്ന്​ മുഖ്യമന്ത്രി പിണറായി വിജയൻ​. വർഗീയതക്കൊപ്പം സമരസപ്പെട്ട്​ പോകുന്ന അവരുടെ രീതിയെക്കുറിച്ചാകും അദ്ദേഹം പറഞ്ഞത്​. യു.ഡി.എഫി​െൻറ നിലപാട്​ മതമൗലികവാദത്തെ ശക്തിപ്പെടുത്തുന്നതാണ്​.

ജമാഅത്തെ ഇസ്​ലാമി ഉൾപ്പെടെയുള്ളവരുമായുള്ള ഇവരുടെ കൂട്ടുകെട്ടാണ്​ ഇതിന്​ കാരണം. ആർ.എസ്​.എസിനെ അംഗീകരിക്കാനും ബി.ജെ.പിക്കൊപ്പം ​േപാകാനും കോൺഗ്രസ്​ നേതാക്കൾക്ക്​​ യാതൊരു മടിയുമില്ലെന്നും പിണറായി കൂട്ടിച്ചേർത്തു.

ഉമ്മൻ ചാണ്ടി കോൺഗ്രസ്​ നേതൃത്വത്തിലേക്ക്​ വന്നത്​ തങ്ങൾക്ക്​ അനുകൂലമായ കാര്യമാണ്​. നിലവിലെ നേതൃത്വം പോരെന്ന്​ തോന്നിയപ്പോഴാകും ഉമ്മൻ ചാണ്ടിക്ക്​ പ്രചാരണനേതൃത്വം കൊടുത്തത്​. ​

അഞ്ച്​ വർഷത്തിനുള്ളിൽ ചെയ്​ത കാര്യങ്ങൾ ജനങ്ങൾക്ക്​ മുന്നിൽ പറയാനാണ്​ ഞങ്ങൾ പോകുന്നത്​. 2016ൽ ഉമ്മൻ ചാണ്ടി എങ്ങനെ തിരസ്​കരിക്കപ്പെട്ടുവെന്നാകും അവർക്ക്​ പറയേണ്ടിവരികയെന്നും മുഖ്യമന്ത്രി പറഞ്ഞു.

കോൺഗ്രസ്​ നേതാക്കൾ പാണക്കാട്​ പോയതിന്​ പിറകിലെ രാഷ്​ട്രീയ സന്ദേശം വ്യക്​തമാണെന്നായിരുന്നു​ എ. വിജയരാഘവൻ കഴിഞ്ഞദിവസം പറഞ്ഞത്​. മുസ്​ലിം ലീഗാണ്​ യു.ഡി.എഫിനെ നിയന്ത്രിക്കുന്നതെന്ന്​ നേരത്തെ ചൂണ്ടികാട്ടിയതാണെന്നും​ ​അദ്ദേഹം പറഞ്ഞിരുന്നു.