'ഫോൺ വിളിച്ചതിന്​ പിന്നിൽ ഗൂഢാലോചന, പൊലീസിൽ പരാതി നൽകും'; വിശദീകരണവുമായി മുകേഷ്​ എം.എൽ.എ

കൊല്ലം: തനിക്കെതിരെ പലരും ഗൂഢാലോചന നടത്തുന്നുണ്ടെന്നും അതിന്‍റെ ഭാഗമായാണ്​ കുട്ടി ഫോൺ വിളിച്ചതെന്നും മുകേഷ്​ എം.എൽ.എ. ഇതിനെതിരെ സൈബർ ​സെല്ലിലും ​പൊലീസിലും പരാതി നൽകുമെന്നും മുകേഷ്​ പറഞ്ഞു. കുട്ടിയോട്​ ദേഷ്യപ്പെട്ട്​ സംസാരിക്കുന്നതിന്‍റെ ഓഡിയോ വിവാദമായതോടെയാണ്​ എം.എൽ.എ മറുപടിയുമായി രംഗത്തുവന്നത്​.

'തെരഞ്ഞെടുപ്പ്​ കഴിഞ്ഞത്​ മുതൽ പലരും തന്നെ നിരന്തരമായി വേട്ടയാടുകയാണ്​. നിരവധി പേരാണ്​ വിളിക്കുന്നത്​​. ഫോൺ വിളികൾ കാരണം ഒരു മണിക്കൂറിനുള്ളിൽ മൊബൈലിലെ ചാർജ്​ തീരുന്ന അവസ്​ഥയാണ്​. ഗൂഢാലോചന നടത്തി തന്നെ പ്രകോപിപ്പിക്കാനാണ് അവരുടെ​ ശ്രമം. ആര്​ ഫോൺ വിളിച്ചാലും എടുക്കുന്ന പ്രകൃതമാണ്​ തനിക്ക്​. എടുക്കാൻ കഴിഞ്ഞില്ലെങ്കിൽ തിരിച്ചുവിളിക്കും.

ഇപ്പോൾ സംഭവിച്ചതും ഒരു ഗൂഢാലോചനയുടെ ഭാഗമാണ്​. ആ കുട്ടി താൻ ഒരു സൂം മീറ്റിങ്ങിൽ പ​ങ്കെടുക്കു​േമ്പാഴാണ്​​ വിളിക്കുന്നത്​. ആദ്യം വിളിച്ചപ്പോൾ യോഗത്തിലാണെന്ന്​ പറഞ്ഞു.​ ആറ്​ തവണയാണ്​ യോഗത്തിനിടെ വീണ്ടും വീണ്ടും വിളിച്ചത്​. ഇതുകാരണം മീറ്റിങ്ങിൽ പ​ങ്കെടുക്കാൻ സാധിച്ചില്ല. പിന്നീട്​ തിരിച്ചുവിളിച്ച്​ സ്വന്തം നാട്ടിലെ എം.എൽ.എയെ ബന്ധപ്പെ​ട്ടോ എന്ന്​ ആരാഞ്ഞു. അദ്ദേഹത്തിന്‍റെ മറുപടി ലഭിച്ചശേഷം തന്നെ ബന്ധപ്പെ​ട്ടോളൂ എന്നാണ് അതുകൊണ്ട്​​ ഉ​ദ്ദേശിച്ചത്​.

സുഹൃത്ത്​ പറഞ്ഞിട്ടാണ്​ അവൻ വിളിച്ചതെന്ന്​ പറഞ്ഞു. എന്നാൽ അയാൾ സുഹൃത്തല്ല, ഈ നാടിന്‍റെ തന്നെ ശത്രുവാണ്​. പലരും ഇത്തരത്തിൽ പ്രകോപിപ്പിക്കുന്നുണ്ട്​. ആറ്​ പ്രാവശ്യം വിളിച്ചതും ഫോൺ റെക്കോർഡ്​ ചെയ്​തതുമെല്ലാം ഗൂഢാലോചനയുടെ ഭാഗമാണ്​. ഇതുപോലെ തന്‍റെ ഒാഫിസിന്‍റെ പേരിൽ ആശുപത്രി, ബാങ്ക്​ എന്നിവിടങ്ങളിലേക്കും പലരും വ്യാജമായി വിളിച്ചിട്ടുണ്ട്​. ഇതിനെതിരെ പരാതി നൽകി​.

കുട്ടികളോട്​ വളരെ നല്ല രീതിയിൽ മാത്രമാണ്​ താൻ പെരുമാറാറുള്ളത്​. ചൂരൽ ഉപയോഗിച്ച്​ അടിക്കണമെന്ന്​ പറഞ്ഞത്​ ആലങ്കാരികമായിട്ടാണ്​. കുട്ടിയുടെ അച്​ഛന്‍റെയോ മൂത്ത ജ്യേഷ്​ഠന്‍റെയോ പ്രായം തനിക്കുണ്ട്​. അതിനാലാണ്​ അത്തരത്തിലെ പ്രയോഗം​ ഉപയോഗിച്ചത്​.

സംഭവത്തിന്​ പിന്നിൽ​ രാഷ്​ട്രീയമുണ്ട്​. പൊലീസിലും സൈബർ സെല്ലിലും പരാതി നൽകാനാണ്​ തീരുമാനം. ഇതിന്​ പിന്നിൽ പ്രവർത്തിച്ചവർ ആരായാലും അവരെ നിയമത്തിന്‍റെ മുന്നിൽ കൊണ്ടുവരും.

ഇത്തരത്തിൽ കുട്ടികൾ ആരെയും വിളിക്കരുത്​. കുട്ടിക്ക്​​ വിഷമം ഉ​ണ്ടായതുപോലെ തനിക്കും അതിലേറെ ഇപ്പോൾ സങ്കട​ം തോന്നുന്നു. ഇത്തരത്തിലൊരു വിഡിയോ ഇടേണ്ടിവന്നതിൽ വിഷമമുണ്ട്​' -മുകേഷ്​ വിഡിയോ സന്ദേശത്തിൽ പറഞ്ഞു.

പാലക്കാട്​ ഒറ്റപ്പാലം സ്വദേശിയായ 10ാം ക്ലാസുകാരനാണ്​ എം.എൽ.എയെ വിളിച്ചത്​. കൂട്ടുകാരൻ കൊടുത്ത നമ്പർ ഉപയോഗിച്ചായിരുന്നു വിളി.

എന്നാൽ, ഫോൺ എടുത്തപാടെ കുറ്റവാളികളെ ചോദ്യം ചെയ്യുന്ന രീതിയിലായിരുന്നു എം.എൽ.എയുടെ സംസാരം. 'ആറ്​ പ്രാവശ്യം എന്തിനാണ്​ വിളിച്ചത്​, ഒറ്റപ്പാലം എം.എൽ.എ മരിച്ചോ, അയാളെ വിളിക്കാതെ എന്തിനാണ്​ എന്നെ വിളിച്ചത്' എന്നുതുടങ്ങി പിന്നീടങ്ങോട്ട്​ ശകാരവർഷമായി. ​തനൊരു വിദ്യാർഥി​ ആണെന്നും 10ാം ക്ലാസിലാണ്​ പഠിക്കുന്നതെന്നും അവൻ പറഞ്ഞു. ആരായാലും തന്നെ വിളിക്കേ​ണ്ടെന്നായിരുന്നു എം.എൽ.എയുടെ മറുപടി. കൂട്ടുകാരനാണ്​ നമ്പർ തന്നതെന്ന്​ പറഞ്ഞപ്പോൾ അവ​െൻറ ചെവിക്കുറ്റി നോക്കി അടിക്കണം എന്നായി പ്രതികരണം.

സംഭാഷണം സമൂഹമാധ്യമത്തിൽ എത്തിയതോടെ രൂക്ഷ വിമർശനമാണ്​ മുകേഷ്​ എം.എൽ.എക്കെതിരെ ഉയർന്നത്​. സംഭവത്തിൽ സി.പി.എം മുകേഷിനോട്​ വിശദീകരണം തേടിയിട്ടുണ്ട്​.