ഓർമയുണ്ടോ ഈ മണ്ഡലങ്ങൾ?

കൊച്ചി: സംസ്ഥാനത്തെ 20 മണ്ഡലത്തിലെ രാഷ്​ട്രീയ ഗതിവിഗതികളാണ്​ ഇപ്പോൾ എങ്ങും ചർച്ച. താരമൂല്യമുള്ളവയായി മാറിയ ഇവയിൽ ചില മണ്ഡലങ്ങൾക്ക്​ വഴിമാറിക്കൊടുത്ത്​ ഓർമയായ മണ്ഡലങ്ങളും കേരളത്തിന്‍റെ ലോക്സഭാ തെരഞ്ഞെടുപ്പ്​ ചരിത്രത്തിലുണ്ട്​. തെരഞ്ഞെടുപ്പ്​ എന്ന രാഷ്ട്രീയ മഹായാത്രയിൽ ​ഇല്ലാതായിപ്പോയ ആ മണ്ഡലങ്ങളെയും അവയുടെ ​രാഷ്ട്രീയപ്പോരാട്ടങ്ങളെയും ഇപ്പോൾ എത്രപേർ ഓർക്കുന്നു​ണ്ടാകും?

1971വരെ കാസർകോട്​, തലശ്ശേരി, വടകര, കോഴിക്കോട്​, മഞ്ചേരി, പൊന്നാനി, പാലക്കാട്​, തൃശൂർ, മുകുന്ദപുരം, എറണാകുളം, മൂവാറ്റുപുഴ, പീരുമേട്​, കോട്ടയം, അമ്പലപ്പുഴ, മാവേലിക്കര, അടൂർ, കൊല്ലം, ചിറയിൻകീഴ്​, തിരുവനന്തപുരം എന്നിങ്ങനെ 19 എണ്ണമായിരുന്നു ലോക്സഭാ മണ്ഡലങ്ങൾ. 1971ലെ തെരഞ്ഞെടുപ്പോടെ തല​ശ്ശേരി, പീരുമേട്​, അമ്പലപ്പുഴ മണ്ഡലങ്ങൾ ഇല്ലാതായി. പകരം 1977ൽ കണ്ണൂർ, ഒറ്റപ്പാലം, ഇടുക്കി, ആലപ്പുഴ മണ്ഡലങ്ങൾ രൂപം കൊണ്ടു. ഇതോടെയാണ്​ മണ്ഡലങ്ങളുടെ എണ്ണം 20ൽ എത്തിയത്​. എന്നാൽ, 2008ലെ മണ്ഡലം പുനർനിർണയത്തിൽ മഞ്ചേരി, ഒറ്റപ്പാലം, മുകുന്ദപുരം, മൂവാറ്റുപുഴ, അടൂർ, ചിറയിൻകീഴ്​ എന്നിങ്ങനെ ആറ്​ മണ്ഡലങ്ങൾ​ ഒറ്റയടിക്ക്​ ഇല്ലാതായി. പകരം വയനാട്​, മലപ്പുറം, ആലത്തൂർ, ചാലക്കുടി, പത്തനംതിട്ട, ആറ്റിങ്ങൽ എന്നിവ വന്നു.

2008ൽ ഇല്ലാതായ മണ്ഡലങ്ങളിലെ അവസാന ലോക്സഭാ തെരഞ്ഞെടുപ്പ്​ 2004ലായിരുന്നു. മുസ്​ലിംലീഗ്​ സ്ഥാനാർഥികളായി നാലുതവണ വീതം ഇബ്രാഹീം സുലൈമാൻ സേട്ടും ഇ. അഹമ്മദും ജയിച്ച മഞ്ചേരിയിലെ അവസാന തെരഞ്ഞെടുപ്പിൽ വിജയം സി.പി.എമ്മിലെ ടി.കെ. ഹംസക്കായിരുന്നു എന്നത്​ ഇപ്പോഴും രാഷ്ട്രീയ കൗതുകമായി ​ശേഷിക്കുന്നു. പനമ്പള്ളി ഗോവിന്ദ മേനോൻ, ഇ. ബാലാനന്ദൻ, സാവിത്രി ലക്ഷ്മണൻ, പി.സി. ചാക്കോ, എ.സി. ജോസ്​, ​കെ. കരുണാകരൻ തുടങ്ങിയവർ ജയിച്ചുകയറിയ മണ്ഡലമാണ്​ മുകുന്ദപുരം. പത്​മജ വേണുഗോപാൽ, ഇ.എം. ശ്രീധരൻ, പി. ഗോവിന്ദപിള്ള, വി. വിശ്വനാഥമേനോൻ, എം.എം. ലോറൻസ്​ തുടങ്ങിയ പ്രമുഖർ തോൽവിയറിഞ്ഞതും ഇവിടെത്തന്നെ. ലോനപ്പൻ നമ്പാടനാണ്​ 2004ൽ ജയിച്ചത്​. മുകുന്ദപുരം പോയപ്പോൾ പകരം വന്നതാണ്​ ചാലക്കുടി.

കേരള കോൺഗ്രസ്​ (എം) ടിക്കറ്റിൽ അഞ്ചുതവണ പി.സി. ​തോമസിനെ ലോക്സഭയിൽ എത്തിച്ച മണ്ഡലമായിരുന്നു മൂവാറ്റുപുഴ. 2004ൽ എൻ.ഡി.എയുമായി ചേർന്ന്​ ഐ.എഫ്​.ഡി.പി സ്ഥാനാർഥിയായപ്പോഴും വിജയം തോമസിനൊപ്പമായിരുന്നു. എന്നാൽ, 529 വോട്ടിന്‍റെ മാത്രം ഭൂരിപക്ഷമുണ്ടായിരുന്ന തോമസ്​ മതവികാരം ചൂഷണം ചെയ്ത്​ വോട്ട്​ പിടിച്ചെന്ന്​ ആരോപിച്ച്​ എതിർ സ്ഥാനാർഥി സി.പി.എമ്മിലെ പി.എം. ഇസ്മായിൽ കോടതിയെ സമീപിച്ചു. ഹൈകോടതിയും സുപ്രീം കോടതിയും ഇസ്മായിലിനെ വിജയിയായി പ്രഖ്യാപിച്ചപ്പോഴേക്കും ലോക്സഭയുടെ കാലാവധി കഴിഞ്ഞതിനാൽ അദ്ദേഹത്തിന്​​ ഒരു ദിവസം പോലും എം.പിയായിരിക്കാൻ ഭാഗ്യമുണ്ടായില്ല.

സുശീല ഗോപാലൻ, തലേക്കുന്നിൽ ബഷീർ, വയലാർ രവി എന്നിവരെ ജയിപ്പിക്കുകയും തോൽപിക്കുകയും ചെയ്ത മണ്ഡലമാണ്​ ചിറിയിൻകീഴ്​. എം.ഐ. ഷാനവാസ്​, എം.എം. ഹസൻ, കെ. സുധാകരൻ എന്നിവരും ഇവിടെ പരാജയമറിഞ്ഞു​. 2004ലെ അവസാന തെരഞ്ഞെടുപ്പിൽ വിജയിച്ചത്​ സി.പി.എമ്മിലെ വർക്കല രാധാകൃഷ്ണനാണ്​. പട്ടികജാതി സംവരണ മണ്ഡലമായിരുന്ന അടൂരിൽ മൂന്നുതവണ കൊടിക്കുന്നിൽ സുരേഷും രണ്ടുതവണ ചെങ്ങറ സുരേന്ദ്രനും വിജയിച്ചിട്ടുണ്ട്​. രാഷ്ട്രപതിയായിരുന്ന കെ.ആർ. നാരായണൻ മൂന്ന്​ തവണയും ലോക്സഭയിലെത്തിയത്​ ഒറ്റപ്പാലത്തുനിന്നാണ്​. സി.പി.എമ്മിലെ എസ്​. അജയകുമാർ നാലുതവണ വിജയിച്ചു. പന്തളം സുധാകരൻ, ലെനിൻ രാജേന്ദ്രൻ എന്നിവർ ഇവിടെ പരാജയ​പ്പെട്ടപ്പോൾ എ.കെ. ബാലൻ ഒരു തവണ വിജയിക്കുകയും ഒരു തവണ തോൽക്കുകയും ചെയ്തു.