വിവാദങ്ങൾക്ക് മീതെ വിവാദങ്ങൾ; സഭ പ്രക്ഷുബ്​ധമാകും

തിരുവനന്തപുരം: സർക്കാറിനെയും മുഖ്യമന്ത്രിയെയും പിടിച്ചുലക്കുന്ന പ്രതിസന്ധികൾക്കും വിവാദങ്ങൾക്കുമിടെ വെള്ളിയാഴ്ച തുടങ്ങുന്ന നിയമസഭ സമ്മേളനം പ്രക്ഷുബ്​ധമാകും. ആദ്യദിനം ചരമോപചാരവും വയനാട്​ ഉരുൾപൊട്ടലിൽ മരിച്ചവരെ സംബന്ധിച്ച റഫറൻസും നടത്തി സഭ പിരിയും.

തിങ്കളാഴ്ച മുതലാകും സഭ സമ്മേളനത്തിൽ വിവാദ വിഷയങ്ങൾ ഉയരുക. നിയമനിർമാണത്തിനാണ്​ പ്രധാനമായും സഭ സമ്മേളനമെങ്കിലും സർക്കാറിനെ വരിഞ്ഞുമുറുക്കിയ വിവാദങ്ങളാകും ആളിക്കത്തുക. പ്രതിപക്ഷത്തിന്​ ​യഥേഷ്ടം ആയുധമുള്ള സമ്മേളനത്തിൽ ഭരണപക്ഷത്തിന്‍റെ പ്രതിരോധം എങ്ങനെയാകുമെന്നതും നിർണായകമാണ്​.

99 അംഗങ്ങളുണ്ടായിരുന്ന ഭരണപക്ഷ ബെഞ്ചിൽനിന്ന്​ പി.വി. അൻവർ ഇടഞ്ഞ്​ പുറത്തിറങ്ങിയതോടെ 98 അംഗങ്ങളാകും ഇനിയുണ്ടാവുക. അൻവറിന്‍റെ പുതിയ ഇരിപ്പിടവും സമ്മേളനത്തിൽ തീരുമാനിക്കും.

എ.ഡി.ജി.പി അജിത്​കുമാറിന്‍റെ ആർ.എസ്​.എസ്​ ബന്ധം, തൃശൂർപൂരം കലക്കൽ വിവാദം, മലപ്പുറത്തിനെതിരെ മുഖ്യമന്ത്രി നടത്തിയ വിവാദ പരാമർശവും തുടർന്നുണ്ടായ നിഷേധവും, ‘ദ ഹിന്ദു’ പത്രത്തിന്​ മുഖ്യമന്ത്രി നൽകിയ അഭിമുഖത്തിൽ പി.ആർ ഏജൻസി ഇടനിലക്കാരായത്, ഹേമ കമ്മിറ്റി റിപ്പോർട്ടിലെ സർക്കാറി​ന്‍റെ ഒളിച്ചുകളി​ ഉൾപ്പെടെ തിളച്ചുമറിയുന്ന വിവാദകാലത്താണ്​ സഭ സമ്മേളനം.