തിരുവനന്തപുരത്ത് കോവിഡ്​ വാർഡിൽ നിന്ന്​ ചാടിപ്പോയ രോഗിയെ പിടികൂടി

തിരുവനന്തപുരം: കോവിഡ് സ്ഥിരീകരിച്ച് തിരുവനന്തപുരം മെഡിക്കൽ കോളജിലെ കോവിഡ്​ വാർഡിൽ ചികിത്സയിലിരിക്കെ ചാടിപ്പോയ ആനാട് സ്വദേശിയെ പിടികൂടി. പിടിച്ചുവെച്ച ശേഷം നാട്ടുകാർ അറിയിച്ചതിനെ തുടർന്ന്​ പൊലീസ്​ ഇയാളെ ആശുപത്രിയില്‍ തിരിച്ചെത്തിച്ചു.

ചൊവ്വാഴ്​ച ഉച്ചയോടെയായിരുന്നു സംഭവം. ആശുപത്രിയിൽ നിന്നും രക്ഷപ്പെട്ട ഇയാള്‍ ബസിൽ യാത്ര ചെയ്താണ് നാട്ടിലെത്തിയത്. ഏകദേശം 22 കിലോമീറ്ററോളം ബസില്‍ സഞ്ചരിച്ചുകാണും എന്നാണ് കണക്കാക്കുന്നത്. ആനാട് ബസിറങ്ങിയത്​ ശ്രദ്ധയിൽപ്പെട്ട നാട്ടുകാർ തടഞ്ഞുവെക്കുകയായിരുന്നു. 
ഇയാളുമായി സമ്പർക്കമുണ്ടായവരെ ഉടൻ കണ്ടെത്താൻ ജില്ല ഭരണകൂടം നിർദേശിച്ചിട്ടുണ്ട്​.

രണ്ട്​ ബസ്​ കയറിയാണ്​ ഇയാൾ നാട്ടിലെത്തിയതെന്നും പറയപ്പെടുന്നു. സംഭവത്തില്‍ മെഡിക്കല്‍ കോളജിന് വീഴ്ചയുണ്ടായെന്ന് ആനാട് പഞ്ചായത്ത് പ്രസിഡൻറ്​ സുരേഷ് ആരോപിച്ചു. ആനാട്​ പ്രദേശത്ത്​ അണുനശീകരണം നടത്താനുള്ള നടപടികൾ ഫയര്‍ഫോഴ്‌സ് സ്വീകരിച്ചുവരികയാണെന്നും സുരേഷ് അറിയിച്ചു. 

അതീവ സുരക്ഷയുള്ള കോവിഡ് വാര്‍ഡില്‍ നിന്ന് എങ്ങിനെയാണ് ഇയാള്‍ കടന്നുകളഞ്ഞതെന്നത്​ അധികൃതരെ കുഴക്കുകയാണ്​. ബസിൽ യാത്ര ചെയ്​തതും അധികൃതർ ഗൗരവത്തോടെയാണ് കാണുന്നത്. ഇയാള്‍ക്കെതിരെ ക്വാറൻറീന്‍ ലംഘനത്തിന് കേസെടുക്കുമെന്ന് പൊലീസ് അറിയിച്ചു. ആശുപത്രിയില്‍ നിന്ന് രക്ഷപ്പെടാന്‍ ഇയാളെ ആരെങ്കിലും സഹായിച്ചിട്ടുണ്ടെങ്കില്‍ അവര്‍ക്കെതിരെയും കേസെടുക്കും.

അതേസമയം, സംഭവത്തില്‍ ആരോഗ്യ മന്ത്രി കെ.കെ. ശൈലജ ടീച്ചര്‍ അന്വേഷണത്തിന്​ ഉത്തരവിട്ടു. രണ്ട് പരിശോധന ഫലങ്ങളും നെഗറ്റിവായി ചൊവ്വാഴ്​ച ഡിസ്ചാര്‍ജ് ചെയ്യാനിരിക്കേയാണ് ഇയാൾ കടന്നുപോയതെന്നാണ് ആശുപത്രി സൂപ്രണ്ട് അറിയിച്ചത്. മദ്യത്തിന് അടിമയായതിനാല്‍ മദ്യം ലഭിക്കാതെ വന്നതിനാലാണ് ഇയാള്‍ ആശുപത്രിയില്‍നിന്നു കടന്നതെന്നാണ്​ അറിയുന്നത്​. യുവാവുമായി സമ്പര്‍ക്കമുണ്ടായവരെ കണ്ടെത്തുന്നതിന് സര്‍വയലന്‍സ് ടീം അടിയന്തിര നടപടി ആരംഭിച്ചെന്നും കോവിഡ് വാർഡിൽ സുരക്ഷ കൂടുതല്‍ ശക്തമാക്കാന്‍ നിർദേശം നല്‍കിയെന്നും ജില്ല കലക്ടര്‍ നവജ്യോത് ഖോസ അറിയിച്ചു.