കോവിഡ്​ ചികിത്സ ​പ്രോ​ട്ടോകോളിൽ മാറ്റം; രോഗലക്ഷണമില്ലാത്ത ആരോഗ്യപ്രവർത്തകർക്ക്​ വീട്ടിൽ ചികിൽസ

തിരുവനന്തപുരം: കോവിഡ്​ ചികിത്സ പ്രോ​ട്ടോകോളിൽ മാറ്റം വരുത്തി സംസ്ഥാന സർക്കാർ. കോവിഡ്​ സ്ഥിരീകരിച്ച്​ രോഗലക്ഷണമില്ലാത്ത ആരോഗ്യപ്രവർത്തകർക്ക്​ വീട്ടിൽകഴിയാൻ സർക്കാർ അനുമതി നൽകി. ഇതിനായി ആരോഗ്യപ്രവർത്തകർ സ്വയം സാക്ഷ്യപ്പെടുത്തിയ അപേക്ഷ സമർപ്പിക്കണം.

ഇത്തരം വീട്ടിൽകഴിയുന്നവർ രോഗലക്ഷണം കണ്ടാലുടൻ ആശുപത്രിയിലേക്ക്​ മാറണം. വീടുകളിൽ കഴിയുന്ന ആരോഗ്യപ്രവർത്തകർക്ക്​ റൂം ക്വാറൻറീൻ നിർബന്ധമാണ്​. വീട്ടിലെ മറ്റുള്ളവരുമായി സമ്പർക്കം പാടില്ല. രോഗം സ്ഥിരീകരിച്ച്​ 10 ദിവസത്തിന്​ ശേഷം ആരോഗ്യപ്രവർത്തകരെ ആൻറിജൻ പരിശോധനക്ക്​ വിധേയമാക്കും. പരിശോധനയിൽ ഫലം നെഗറ്റീവായാലും ഇവർ ഏഴ്​ ദിവസം ക്വാറൻറീനിൽ കഴിയണം.

കോവിഡ്​ രോഗികളെ വീടുകളിൽ തന്നെ ചികിൽസിക്കാൻ കേന്ദ്രസർക്കാർ നേരത്തെ തന്നെ അനുമതി നൽകിയിരുന്നു. ഐ.സി.എം.ആറും ഇത്​ അംഗീകരിച്ചിരുന്നു. എന്നാൽ, കേരളം ഇതുവരെ ഈ പരിഷ്​കാരം നടപ്പാക്കിയിരുന്നില്ല.