ഓണത്തിനുശേഷം ഭയപ്പെട്ട രീതിയിൽ കോവിഡ് വർധിച്ചില്ല; വാക്​സിനെടുത്തവരിൽ മരണ നിരക്ക്​ കുറവ്​ ​-മുഖ്യമന്ത്രി

തിരുവനന്തപുരം: ഓണത്തിനുശേഷം ഭയപ്പെട്ട രീതിയിലുള്ള കോവിഡ് വർധന ഉണ്ടായില്ലെന്നും ഇക്കഴിഞ്ഞ മൂന്നാഴ്ച ആശുപത്രിയിൽ അഡ്​മിറ്റായ രോഗികളുടെ ശതമാനത്തിൽ കുറവുണ്ടെന്നും മുഖ്യമന്ത്രി പിണറായി വിജയൻ. കേസുകളുടെ എണ്ണം 33,000 കഴിഞ്ഞിട്ടില്ല.

​​വീട്ടിൽ ക്വാറന്‍റീനിൽ കഴിയുന്നവർ നിർദേശം ലംഘിച്ചാൽ സി.എഫ്​.എൽ.ടി.സിയിലേക്ക്​ മാറ്റും. അത്തരക്കാർക്ക്​ പിഴ ചുമത്തും.

കോവിഡിനെതിരെ എല്ലാവരും പോരാളികളാകണമെന്ന സന്ദേശവുമായി 'ബി ​ദ വാരിയർ'കാമ്പയിൻ നടത്തും. ഇതിന്‍റെ ലോഗോ ആരോഗ്യമ​ന്ത്രി വീണ ജോർജിന്​ കൈമാറി മുഖ്യമന്ത്രി പ്രകാശനം ചെയ്​തു.

വാക്​സിനേഷൻ എടുത്തവർക്ക്​ രോഗം വരുന്നുണ്ടെങ്കിലും രോഗം ഗുരുതരമാകുന്ന സാഹചര്യം വിരളമാണെന്ന്​ മുഖ്യമന്ത്രി പറഞ്ഞു. അതിനാൽ ആശങ്കാജനകമല്ല. അവരിൽ മരണ നിരക്ക്​ കുറവാണ്​. കോവിഡ്​ ബാധിച്ച്​ മരിച്ചവരിൽ അധികവും പ്രായമായവരാണ്​. വാക്​സിനെടുക്കാത്ത പ്രായമായവർ ഉടൻ വാക്​സിനെടുക്കണം. അനുബന്ധ രോഗമുള്ളവരിലും കോവിഡ്​ പ്രശ്​നം സൃഷ്​ടിക്കും. ഈ വിഭാഗത്തിലുള്ളവരും ഉടൻ വാക്​സിനെടുക്കണമെന്ന്​ മുഖ്യമന്ത്രി ആവശ്യപ്പെട്ടു.